مصنف ابن ابي شيبه

حضرت قتادہ فرماتے ہیں کہ حضرت انس نے ارشاد فرمایا : حضرت معاذ اور حضرت ابی ّ اور حضرت سعد اور حضرت ابو زید نے آپ صلی اللہ علیہ وآلہ وسلم کے سامنے قرآن پڑھا، قتادہ فرماتے ہیں ! میں نے پوچھا ! ابو زید کون تھے ؟ آپ نے فرمایا : نبی کریم صلی اللہ علیہ وآلہ وسلم کے زمانے میں ایک عام انصاری صحابی تھے۔

اسماعیل فرماتے ہیں کہ امام شعبی نے ارشاد فرمایا : ان حضرات نے نبی صلی اللہ علیہ وآلہ وسلم کے زمانے میں قرآن پڑھا حضرت ابی ّ ، حضرت معاذ ، حضرت زید ، حضرت ابو زید ، حضرت ابو الدرداء ، اور حضرت سعید بن عبید وغیرہ، اور نبی صلی اللہ علیہ وآلہ وسلم کے خلفاء میں سے کسی نے بھی ان کے سامنے قرآن نہیں پڑھا سوائے حضرت عثمان کے۔ اور حضرت مجمع بن جاریہ نے بھی ایک یا دو سورتیں آپ صلی اللہ علیہ وآلہ وسلم کے سامنے پڑھیں۔

حضرت عبد اللہ بن مسعود رضی اللہ عنہ فرماتے ہیں کہ حضرت معاذ نبی صلی اللہ علیہ وآلہ وسلم کے پاس حاضر ہوئے اور فرمایا : اے اللہ کے رسول (صلی اللہ علیہ وآلہ وسلم) ! مجھے قرآن پڑھا دیجیے۔ پس رسول اللہ صلی اللہ علیہ وآلہ وسلم نے فرمایا : اے عبد اللہ ! اس کو قرآن پڑھا دو ۔ پس جو مجھے یاد تھا میں نے ان کو پڑھا دیا، پھر میں اور وہ رسول اللہ صلی اللہ علیہ وآلہ وسلم کے پاس گئے، تو حضرت معاذ نے آپ صلی اللہ علیہ وآلہ وسلم کے سامنے قرآن پڑھا۔ اور حضرت معاذ رسول اللہ صلی اللہ علیہ وآلہ وسلم کے زمانے میں قرآن سکھانے والے معلمین میں سے ایک معلم تھے۔

حضرت خمیر بن مالک فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا : میں نے رسول اللہ صلی اللہ علیہ وآلہ وسلم کے منہ مبارک سے ستر سورتیں سیکھی ہیں۔ اور بیشک زید بن ثابت کو لکھنے والوں میں دو نمایاں خصوصیتیں حاصل ہیں۔

حضرت سعید بن جبیر فرماتے ہیں کہ حضرت ابن عباس رضی اللہ عنہما نے ارشاد فرمایا : میں نے رسول اللہ صلی اللہ علیہ وآلہ وسلم کے زمانے میں محکم آیات جمع کی تھیں۔ یعنی وہ آیات جو ظاہر و واضح ہیں ان میں کسی تاویل کی ضرورت نہیں۔

حضرت ہشام فرماتے ہیں کہ حضرت محمد نے ارشاد فرمایا : ہمارے ساتھی اس بات میں اختلاف نہیں کرتے تھے کہ بیشک رسول اللہ صلی اللہ علیہ وآلہ وسلم وصال فرما گئے اس حال میں کہ آپ صلی اللہ علیہ وآلہ وسلم کے اصحاب میں سے صرف چار نے آپ صلی اللہ علیہ وآلہ وسلم کے سامنے قرآن پڑھا۔ اور وہ سب انصار میں سے تھے۔ حضرت معاذ بن جبل ، حضرت ابی ّ بن کعب ، حضرت زید اور حضرت ابو زید ۔