مصنف ابن ابي شيبه

حضرت ابو اسحاق فرماتے ہیں کہ حضرت حکم نے ارشاد فرمایا : جو شخص منادی کی آواز سنے کہ وہ نماز کے کھڑے ہونے کی ندا لگا رہا ہے، تو یوں دعا کرے : اے اللہ ! پروردگار اس پوری پکار کے اور قائم ہونے والی نماز کے ۔ عطا فرما محمد کو ان کی درخواست قیامت کے دن۔ تو اس وجہ سے اس کی شفاعت کی جائے گی۔

حضرت ابو حمزہ فرماتے ہیں کہ حسن نے ارشاد فرمایا : جب تو مؤذن کو یہ جملہ کہتے ہوئے سنے : تحقیق نماز کھڑی ہوگئی ۔ تو یوں دعا کر : اے اللہ ! پروردگار اس پوری پکار کے اور کھڑی ہونے والی نماز کے ، عطافرما قیامت کے دن محمد (صلی اللہ علیہ وآلہ وسلم) کو ان کی درخواست۔ مؤذن کے کھڑے ہوتے وقت کوئی آدمی یہ دعا نہیں کرتا مگر یہ کہ اللہ اس آدمی کو قیامت کے دن محمد (صلی اللہ علیہ وآلہ وسلم) کی شفاعت میں داخل کریں گے۔

حضرت قتادہ فرماتے ہیں کہ حضرت عثمان جب مؤذن کو یہ کلمات پڑھتے ہوئے سنتے : تحقیق نماز کھڑی ہوگئی، تو ارشاد فرماتے : بہت خوب انصاف کی بات کرنے والو، اور خوش آمدید نماز۔ پھر نماز کے لیے کھڑے ہوجاتے۔

حضرت مجاہد جب مؤذن کے اس کلمہ کو سنتے : آؤ نماز کی طرف تو فرماتے ؛ اللہ کی مدد سے ، پس جب مؤذن کہتا ! آؤ کامیابی کی طرف تو کہتے : گناہوں سے بچنے کی طاقت اور نیکی کرنے کی قوت صرف اللہ کی مدد سے ہے۔

حضرت عبد اللہ بن حارث فرماتے ہیں بیشک نبی کریم صلی اللہ علیہ وآلہ وسلم پڑھتے تھے جیسا کہ مؤذن پڑھتا تھا۔ پس جب مؤذن کہتا : آؤ نماز کی طرف آؤ کامیابی کی طرف تو آپ صلی اللہ علیہ وآلہ وسلم یوں کہتے : گناہوں سے بچنے کی طاقت اور نیکی کے کرنے کی قوت صرف اللہ کی مدد سے ہے۔