مصنف ابن ابي شيبه

حضرت فاطمہ بنت رسول اللہ صلی اللہ علیہ وآلہ وسلم فرماتی ہیں : جب رسول اللہ صلی اللہ علیہ وآلہ وسلم مسجد میں داخل ہوتے تو یوں دعا فرماتے : اللہ کے نام کے ساتھ داخل ہوتا ہوں اور رسول اللہ صلی اللہ علیہ وآلہ وسلم کے طریقہ پر۔ اے اللہ ! میرے گناہوں کو معاف فرما۔ اور میرے لیے اپنی رحمت کے دروازے کھول دے۔ اور جب نکلتے تو یوں دعا فرماتے ! اللہ کے نام کے ساتھ نکلتا ہوں ، اور رسول اللہ صلی اللہ علیہ وآلہ وسلم پر سلامتی ہو۔ اے اللہ ! میرے گناہوں کو معاف فرما۔ اور میرے لیے اپنے فضل و رحمت کے دروازے کھول دے۔

حضرت مطلب بن عبد اللہ بن حنطب فرماتے ہیں کہ رسول اللہ صلی اللہ علیہ وآلہ وسلم جب مسجد میں داخل ہوتے تو یوں دعا فرماتے : اے اللہ ! تو میرے لیے اپنی رحمت کے دروازے کھول دے اور میرے لیے اپنے رزق کے دروازوں کو آسان فرما دے۔

حضرت نعمان بن سعد فرماتے ہیں کہ حضرت علی رضی اللہ عنہ جب مسجد میں داخل ہوتے تو یوں دعا فرماتے : اے اللہ ! تو میرے گناہوں کو معاف فرما، اور تو میرے لیے اپنے فضل اور رحمت کے دروازوں کو کھول دے۔ اور جب مسجد سے نکلتے تو یوں دعا فرماتے ! اے اللہ ! تو میرے گناہوں کو معاف فرما۔ اور تو میرے لیے اپنے فضل کے دروازوں کو کھول دے۔

حضرت ابوہریرہ فرماتے ہیں کہ حضرت کعب بن عجرہ نے مجھ سے ارشاد فرمایا : جب تو مسجد حرام میں داخل ہو تو نبی کریم صلی اللہ علیہ وآلہ وسلم پر سلام بھیج اور یہ دعا پڑھ : اے اللہ ! تو میرے لیے اپنی رحمت کے دروازوں کو کھول دے۔ اور جب تو نکلے تو نبی کریم صلی اللہ علیہ وآلہ وسلم پر سلام بھیج۔ اور یہ دعا پڑھ : اے اللہ ! تو شیطان مردود سے میری حفاظت فرما۔

حضرت محمد بن عبد الرحمن فرماتے ہیں کہ حضرت عبد اللہ بن سلام جب مسجد میں داخل ہوتے تو نبی کریم صلی اللہ علیہ وآلہ وسلم پر سلام بھیجتے اور یہ دعا پڑھتے ! اے اللہ ! تو میرے لیے اپنی رحمت کے دروازوں کو کھول دے۔ اور جب مسجد سے نکلتے تو نبی کریم صلی اللہ علیہ وآلہ وسلم پر سلام بھیجتے اور شیطان سے پناہ مانگتے۔

حضرت سعید بن ذی حدان فرماتے ہیں کہ حضرت علقمہ جب مسجد میں داخل ہوتے تو فرماتے : اے نبی ! آپ پر سلامتی ہو اور اللہ کی رحمتیں اور برکتیں نازل ہوں۔ اللہ اور اس کے فرشتے محمد (صلی اللہ علیہ وآلہ وسلم) پر درود بھیجیں۔

حضرت اعمش فرماتے ہیں کہ ابراہیم جب مسجد میں داخل ہوتے تو یوں فرماتے : اللہ کے نام کے ساتھ داخل ہوتا ہوں اور رسول اللہ صلی اللہ علیہ وآلہ وسلم پر سلامتی ہو۔