مصنف ابن ابي شيبه

حضرت ابوبکر فرماتے ہیں کہ میں نے رسول اللہ صلی اللہ علیہ وآلہ وسلم کو اس سال کی گرمیوں میں یہ فرماتے ہوئے سنا ہے : تم لوگ اللہ سے عافیت اور آخرت اور دنیا میں یقین کا سوال کرو۔

حضرت ابوبکر فرماتے ہیں کہ میں نے رسول اللہ صلی اللہ علیہ وآلہ وسلم کو اس سال قریب کے زمانے میں یہ فرماتے ہوئے سنا ہے : تم لوگ اللہ سے عافیت اور یقین طلب کرو۔

حضرت عبدالرحمن بن ابی بکرہ فرماتے ہیں کہ میں سنتا تھا میرے والد صبح و شام یہ دعا پڑھا کرتے تھے : ” اے اللہ تو میرے جسم میں مجھے عافیت بخش دے ، اے اللہ ! تو میرے دیکھنے میں مجھے عافیت بخش دے، نہیں ہے کوئی معبود سوائے تیرے “ پس میں نے اپنے والد سے کہا : اے ابا جان ! میں آپ کو سنتا ہوں آپ صبح و شام یہ دعا پڑھتے ہیں ؟ وہ فرمانے لگے : اے میرے لاڈلے بیٹے ! میں نے رسول اللہ صلی اللہ علیہ وآلہ وسلم کو یہ دعا پڑھتے ہوئے سنا ہے، اور میں پسند کرتا ہوں کہ میں آپ صلی اللہ علیہ وآلہ وسلم کی سنت کو اپنانے والا ہوں۔

حضرت عبد اللہ بن الحارث فرماتے ہیں کہ عباس نے کہا : اے اللہ کے رسول (صلی اللہ علیہ وآلہ وسلم) مجھے ایسی چیز سکھا دیں جس کا میں اپنے رب سے سوال کروں ؟ آپ صلی اللہ علیہ وآلہ وسلم نے فرمایا : اپنے رب سے دنیا و آخرت میں عافیت طلب کرو۔

حضرت ابن عمر رضی اللہ عنہما فرماتے ہیں کہ نبی کریم صلی اللہ علیہ وآلہ وسلم نے فرمایا : جو کوئی آدمی اللہ سے کسی چیز کا سوال کرتا ہے تو سب سے پسندیدہ بات یہ ہے کہ وہ اللہ سے عافیت کا سوال کرے۔

حضرت عائشہ رضی اللہ عنہا فرماتی ہیں کہ اگر میں جان لوں کہ فلاں رات لیلۃ القدر ہے تو میں اس میں اللہ سے صرف عافیت کا سوال کروں۔

حضرت ابو مالک الاشیعس کے والد فرماتے ہیں کہ انہوں نے نبی کریم صلی اللہ علیہ وآلہ وسلم سے سنا ہے : ایک آدمی آپ صلی اللہ علیہ وآلہ وسلم کے پاس حاضر ہوا اور کہنے لگا : جب میں اپنے رب سے سوال کروں تو کیسے دعا کروں ؟ آپ صلی اللہ علیہ وآلہ وسلم نے فرمایا : تو کہہ : اے اللہ ! مجھ پر رحم فرما، اور مجھے بخش دے، اور مجھے عافیت عطا فرما، اور مجھے رزق عطا کر، اور آپ صلی اللہ علیہ وآلہ وسلم نے انگوٹھے کے علاوہ اپنی چاروں انگلیوں کو جمع کر کے فرمایا : پس یہ ساری چیزیں تیرے دین و دنیا کو شامل ہیں۔ (یا جمع کرتی ہیں)

حضرت عائشہ رضی اللہ عنہا فرماتی ہیں کہ اگر مجھے معلوم ہوجاتا کہ کون سی رات لیلۃ القدر کی ہے ؟ تو میں اس رات میں کثرت سے یہ دعا کرتی : میں اللہ سے معافی اور عافیت کا سوال کرتی ہوں۔

حضرت ابو الحسن ھلال بن یساف فرماتے ہیں کہ رسول اللہ صلی اللہ علیہ وآلہ وسلم کا راشاد ہے کہ : جمعہ کے دن میں ایک گھڑی ہوتی ہے ، مسلمان بندہ اس گھڑی سے موافقت نہیں کرتا اور اللہ سے بھلائی کا سوال نہیں کرتا مگر اللہ تعالیٰ اس کو ضرور عطا فرماتے ہیں تو ایک آدمی کہنے لگا : اے اللہ کے رسول (صلی اللہ علیہ وآلہ وسلم) ! میں اس میں کیا مانگوں ؟ آپ صلی اللہ علیہ وآلہ وسلم نے فرمایا : تو اللہ سے دنیا و آخرت میں عافیت کا سوال کر۔