مصنف ابن ابي شيبه

حضرت خلاس فرماتے ہیں کہ حضرت علی رضی اللہ عنہ سے اس مرتدہ عورت کے بارے میں مروی ہے جس کو قیدی بنا لیا گیا کہ آپ نے فرمایا : اس کو قتل کردیا جائے گا۔

حضرت ابورزین فرماتے ہیں کہ حضرت ابن عباس رضی اللہ عنہما نے ارشاد فرمایا : عورتوں کو قتل نہیں کیا جائے گا جب وہ اسلام سے مرتد ہوجائیں لیکن ان کو قید کرلیا جائے گا اور ان کو اسلام کی طرف بلایا جائے گا اور اس پر انہیں مجبور کیا جائے گا۔

حضرت لیث فرماتے ہیں کہ حضرت عطاء نے مرتدہ عورت کے بارے میں ارشاد فرمایا : اسے قتل نہیں کیا جائے گا۔

حضرت عمرو فرماتے ہیں کہ حسن بصری نے ارشاد فرمایا : اس عورت کو قتل نہیں کیا جائے گا۔

حضرت اشعث فرماتے ہیں کہ حسن بصری نے ارشاد فرمایا : تم عورتوں کو قتل مت کرو جب وہ اسلام سے مرتد ہوجائیں۔ لیکن ان کو اسلام کی طرف بلایا جائے گا پس اگر وہ انکار کردیں تو ان کو قیدی بنا لیا جائے اور ان کو مسلمانوں کی باندیاں بنادیا جائے اور ان کو قتل نہ کیا جائے۔

حضرت ابوحرہ فرماتے ہیں کہ حسن بصری سے اس عورت کے بارے میں مروی ہے جو اسلام سے مرتد ہوجائے۔ آپ نے فرمایا : اس کو قتل نہیں کیا جائے گا اس کو قید کردیا جائے گا۔

حضرت عبیدہ فرماتے ہیں کہ ابراہیم نے ارشاد فرمایا : اس کو قتل نہیں کیا جائے گا۔

حضرت ہشام فرماتے ہیں کہ حسن بصری نے مرتدہ عورت کے بارے میں ارشاد فرمایا : اس سے توبہ طلب کی جائے گی پس اگر وہ توبہ کرلے تو ٹھیک ورنہ اسے قتل کردیا جائے گا۔

حضرت یحییٰ بن سعید فرماتے ہیں کہ حضرت عمر بن عبدالعزیز سے مروی ہے مسلمانوں میں سے ایک آدمی کی ام ولدہ مرتد ہوگئی تو آپ نے اس کو دومۃ الجندل میں اس کے دین کے مخالف آدمی کو فروخت کردیا۔

حضرت ابو معشر فرماتے ہیں کہ ابراہیم سے اس عورت کے بارے میں مروی ہے جو اسلام سے مرتد ہوجائے، آپ نے فرمایا : اس سے توبہ طلب کی جائے گی پس اگر وہ توبہ کرلے تو ٹھیک ورنہ اسے قتل کردیا جائے۔

حضرت ابو معشر فرماتے ہیں کہ ابراہیم نے ارشاد فرمایا : اس سے توبہ طلب کی جائے گی پس اگر وہ توبہ کرلے تو ٹھیک ورنہ اسے قتل کردیا جائے۔

حضرت حماد فرماتے ہیں کہ ابراہیم نے ارشاد فرمایا : اس عورت کو قتل کردیا جائے گا۔