مصنف ابن ابي شيبه

یونس فرماتے ہیں کہ حسن بصری نے ارشاد فرمایا : جھوٹے گواہ کو کچھ مارا جائے گا، اور لوگوں میں تشہیر کروا دی جائے اور کہا جائے : بیشک اس نے جھوٹی گواہی دی ہے۔

حضرت اشعث فرماتے ہیں کہ حضرت شعبی نے ارشاد فرمایا : جھوٹے گواہ کو چالیس سے کم کوڑے مارے جائیں گے : پینتیس، چھتیس اور سینتیس۔

حضرت معمر فرماتے ہیں کہ حضرت زھری نے ارشاد فرمایا : جھوٹے گواہ کو حد سے کم سزا دی جائے گی۔

حضرت جعد ابو عثمان فرماتے ہیں کہ قاضی شریح کے پاس جب جھوٹا گواہ لایا جاتا تو آپ اسے چند کوڑے مارتے تھے۔

حضرت عبداللہ بن سعید فرماتے ہیں کہ حضرت عمر بن عبدالعزیز نے جھوٹے گواہ کو ستر کوڑے مارے۔

حضرت مکحول اور حضرت ولید بن ابو مالک فرماتے ہیں کہ حضرت عمر بن خطاب نے جھوٹے گواہ کے بارے میں خط لکھا : اس کو چالیس کوڑے مارے جائیں گے، اس کا چہرہ کالا کردیا جائے، اس کا سر منڈوا دیا جائے، اسے چکر لگوایا جائے اور اس کو لمبی مدت کے لیے قید کردیا جائے۔