مصنف ابن ابي شيبه

حضرت زھری فرماتے ہیں کہ مروان بن حکم کے پاس چند لوگ لائے گئے جو قبروں سے کفن چوری کرتے تھے تو مروان نے ان کو مارا اور ان کو جلا وطن کردیا اس حال میں کہ رسول اللہ صلی اللہ علیہ وآلہ وسلم کے صحابہ وافر مقدار میں موجود تھے۔

حضرت زھری فرماتے ہیں کہ حضرت معاویہ کے زمانۂ خلافت میں جب مروان مدینہ کا امیر تھا تو اس دوران ایک کفن چور کو پکڑا گیا تو مروان نے مدینہ میں موجود رسول اللہ صلی اللہ علیہ وآلہ وسلم کے صحابہ اور فقہاء سے اس کے متعلق پوچھا ؟ پس ان سب نے کسی کو نہیں پایا جس نے کفن چور کا ہاتھ کاٹا ہو سو ان سب کی رائے اس بات پر متفق ہوئی کہ اس کو مارا جائے اور چکر لگوایا جائے۔

حضرت معمر فرماتے ہیں کہ مجھے خبر پہنچی ہے کہ حضرت عمر بن عبدالعزیز نے کفن چور کا ہاتھ کاٹا۔

حضرت حکم فرماتے ہیں کہ حضرت شعبی اور ابراہیم نے ارشاد فرمایا : ہمارے مردوں کے چور کا بھی ایسے ہی ہاتھ کاٹا جائے گا جیسا کہ ہمارے زندوں کے چور کا کاٹا جاتا ہے۔

حضرت حجاج فرماتے ہیں کہ میں نے حضرت عطاء سے کفن چور کے متعلق پوچھا ؟ آپ نے فرمایا : اس کا ہاتھ کاٹا جائے گا۔

حضرت عبدالملک فرماتے ہیں کہ حضرت عطاء سے کفن چور کے بارے میں مروی ہے۔ آپ نے ارشاد فرمایا : وہ چور کے درجہ میں ہے اس کا ہاتھ کاٹا جائے گا۔

حضرت اشعث فرماتے ہیں کہ میں نے حسن بصری سے کفن چور کے متعلق سوال کیا ؟ تو آپ نے فرمایا : اس کا ہاتھ کاٹا جائے گا اور میں نے حضرت شعبی سے سوال کیا ؟ تو آپ نے بھی فرمایا : اس کا ہاتھ کاٹا جائے گا۔

حضرت حکم اور حضرت حماد فرماتے ہیں کہ ابراہیم سے کفن چور کے بارے میں مروی ہے آپ نے ارشاد فرمایا : اس کا ہاتھ کاٹا جائے گا۔

حضرت مغیرہ فرماتے ہیں کہ حضرت حماد اور ان کے اصحاب نے فرمایا : کفن چور کا ہاتھ کاٹا جائے گا اس لیے کہ وہ میت کے گھر میں داخل ہوا تھا۔

حضرت ابن یمان کسی شیخ سے نقل کرتے ہیں کہ حضرت مکحول نے ارشاد فرمایا : ہاتھ نہیں کاٹا جائے گا مگر یہ کہ قبر کا دروازہ ہو۔

حضرت عبداللہ بن مختار فرماتے ہیں کہ حضرت معاویہ بن قرہ نے ارشاد فرمایا : کفن چوری کرنے والا چور ہے پس اس کا ہاتھ کاٹ دو ۔

حضرت حجاج فرماتے ہیں کہ حضرت مسروق ، ابراہیم نخعی ، حضرت شعبی حضرت زاذان اور حضرت ابو ذرعہ بن عمرو بن جریر یہ سب حضرات کفن چور کے بارے میں فرمایا کرتے تھے کہ اس کا ہاتھ کاٹا جائے گا۔

حضرت عکر مہ فرماتے ہیں کہ حضرت ابن عباس رضی اللہ عنہما نے ارشاد فرمایا : کفن چور پر ہاتھ کاٹنے کی سزا جاری نہیں ہوگی اس پر کاٹنے کے مشابہ سزا ہوگی۔