مصنف ابن ابي شيبه

حضرت محمد بن اسحاق فرماتے ہیں کہ حضرت قاسم سے ایک آدمی کے متعلق پوچھا گیا جو کسی آدمی کو یوں کہہ دے : اے درزی کے بیٹے، یا اے پچھنے لگانے والے کے بیٹے، یا اے قصائی کے بیٹے اور حالانکہ اس کا باپ ایسا نہیں ہے تو اس کا کیا حکم ہے ؟ اس پر حضر ت قاسم نے فرمایا : تحقیق ہم نے یوں پایا تھا کہ حدود قائم نہیں جاتی تھیں مگر واضح تہمت لگانے کی صورت میں یا واضح طو ر پر نفی کرنے کی صورت میں۔

حضرت عبدالکریم فرماتے ہیں کہ حضرت سعید بن مسیب نے ارشاد فرمایا : حد جاری نہیں ہوگی مگر اس شخص پر جو حد کو بالکل واضح طور پر گاڑے۔

حضرت اسماعیل بن سالم فرماتے ہیں کہ دو آدمیوں نے مبہم انداز میں زنا کی تہمت لگائی تو حضرت شعبی نے ان پر حد جاری نہ ہونے کا فتویٰ دیا۔

حضرت ابن طاؤس فرماتے ہیں کہ حضرت طاؤس مبہم بات میں حد کو لازم نہیں سمجھتے تھے۔

حضرت منصور فرماتے ہیں کہ حسن بصری نے ارشاد فرمایا : اس شخص پر حد نہیں ہوگی یہاں تک کہ یوں کہے : اے زانی، اے زانیہ یا اے زانیہ عورت کے بیٹے۔

حضرت شعبہ فرماتے ہیں کہ حضرت حماد سے ایسے شخص کے بارے میں مروی ہے جس نے ایک شخص کو کہا : بیشک تیری پیٹھ میں حد زنا لگے گی۔ آپ نے فرمایا : اگر وہ چاہے تو یوں کہہ دے کہ بیشک میں نے تو ایسے کہا تھا : بیشک تیری پیٹھ حد لگنے کی جگہ ہے آپ نے فرمایا : اس پر حد جاری نہیں ہوگی۔

حضرت عوف فرماتے ہیں کہ حسن بصری نے ارشاد فرمایا : حد قذف واضح تہمت کی صورت میں ہی لگے گی۔