مصنف ابن ابي شيبه

حضرت شعبی اور حسن بصری نے ارشاد فرمایا : جب کسی نے پوری قوم پر تہمت لگا دی تو اس پر ایک ہی سزا کے طور پر کوڑے لگائے جائیں گے اور جب اس نے مختلف لوگوں پر تہمت لگائی تو ان میں سے ہر ایک کی وجہ سے اس کو بطور سزا کے کوڑے لگائے جائیں گے۔

یونس فرماتے ہیں کہ حسن بصری سے ایسے آدمی کے بارے میں مروی ہے جس نے پوری قوم پر تہمت لگادی۔ آپ نے فرمایا : ان میں سے ہر ایک انسان کی وجہ سے اس کو بطور سزا کے کوڑے لگائے جائیں گے۔

حضرت ابو معشر فرماتے ہیں کہ ابراہیم سے ایسے شخص کے بارے میں مروی ہے جس نے ایک ہی تہمت پوری قوم پر لگادی ہو۔ آپ نے فرمایا : اس پر ایک ہی حد جاری ہوگی۔ اور حضرت قتادہ نے فرمایا : حسن بصری سے منقول ہے کہ ان میں سے ہر ایک آدمی کی وجہ سے حد ہوگی۔

حضرت سفیان فرماتے ہیں کہ حضرت حماد نے ارشاد فرمایا : اس کو ایک ہی سزا دی جائے گی۔

حضرت مغیرہ فرماتے ہیں کہ ابراہیم نے ارشاد فرمایا : جب اس نے کئی بار تہمت لگائی تو ایک ہی سزا ہوگی۔

حضرت معمر فرماتے ہیں کہ حضرت زہری فرمایا کرتے تھے : جب آدمی نے قوم پر ایک ہی تہمت لگادی تو اس پر ایک ہی سزا لازم ہوگی۔

حضرت ابو العلائ فرماتے ہیں کہ حضرت قتادہ اور حضرت ابو ہاشم سے ایسے آدمی کے بارے میں مروی ہے جس نے پوری قوم پر جھوٹی تہمت لگائی۔ آپ نے فرمایا ؟ اس پر ایک سزا لازم ہوگی۔

حضرت ابن جریج فرماتے ہیں کہ حضرت عطاء سے ایسے شخص کے بارے میں مروی ہے جو کسی گھرو الوں پر داخل ہوا اور اس نے ان پر تہمت لگادی۔ آپ نے فرمایا : ایک حد ہوگی۔

حضرت عبدالکریم فرماتے ہیں کہ حضرت طاؤس نے ارشاد فرمایا : ایک ہی حد ہوگی۔

حضرت ادریس فرماتے ہیں کہ حضرت حماد نے ارشاد فرمایا : اس کو ایک ہی سزا دی جائے گی۔

حضرت ہشام بن عروہ فرماتے ہیں کہ حضرت عروہ سے ایسے شخص کے بارے میں مروی ہے جس نے پوری قوم پر تہمت لگائی ہو۔ آپ نے فرمایا : اگر اس نے ایک ہی کلام میں تہمت لگائی تو اس پر ان میں سے ہر ایک کی وجہ سے سزا لازم ہوگی۔ اور چور کا بھی یہ ہی حکم ہے۔