مصنف ابن ابي شيبه

حضرت عطاء فرماتے ہیں کہ حضرت ابن عباس رضی اللہ عنہما نے ارشاد فرمایا : ڈھال کی قیمت سے کم میں چور کا ہاتھ نہیں کاٹا جائے گا، اور ڈھال کی قیمت دس دراھم ہیں۔

حضرت عبداللہ بن عمرو فرمایا کرتے تھے کہ ڈھال کی قیمت دس دراھم ہیں۔

حضرت قاسم فرماتے ہیں کہ حضرت ابن مسعود نے ارشاد فرمایا : ہاتھ نہیں کاٹا جائے مگر ایک دینار یا دس دراھم کی قیمت میں۔

حضرت حکم فرماتے ہیں کہ حضرت ابو جعفر نے ارشاد فرمایا : ڈھال کی قیمت ایک دینار ہے جس میں ہاتھ کاٹ دیا جائے گا۔

حضرت عبدالملک بن ابو سلیمان فرماتے ہیں کہ حضرت عطاء نے ارشاد فرمایا : سب سے کم درجہ کسی چیز میں جس میں چور کا ہاتھ کاٹا جاتا ہے وہ ڈھال کی قیمت ہے اور ڈھال کی قیمت صحابہ کے زمانے میں ایک دینار یا دس دراھم لگائی جاتی تھی۔

ابراہیم فرماتے ہیں کہ حضر ت عبداللہ بن مسعود نے ارشاد فرمایا : ہاتھ نہیں کاٹا جائے گا مگر ڈھال یا چمڑے کی ڈھال میں راوی کہتے ہیں ! میں نے ابراہیم سے دریافت کیا : اس کی قیمت کتنی ہوتی ہے ؟ آپ نے فرمایا : ایک دینار۔

حضرت ہشام بن عروہ فرماتے ہیں کہ ان کے والد حضرت عروہ نے ارشاد فرمایا : نبی کریم صلی اللہ علیہ وآلہ وسلم کے زمانے میں چور کا ہاتھ ڈھال کی قیمت کے برابر چیز کی چوری میں کاٹا جاتا تھا اور ڈھال کی اس وقت ایک قیمت ہوتی تھی۔ اور اس وقت حقیر اور گھٹیا چیز کی چوری میں ہاتھ نہیں کاٹا جاتا تھا۔

حضرت ابن طاؤس فرماتے ہیں کہ ان کے والد حضرت طاؤس نے ارشاد فرمایا : ڈھال کی قیمت میں ہاتھ کاٹا جائے گا۔

حضرت قاسم فرماتے ہیں کہ حضرت عمر کے پاس ایک چور لایا گیا آپ نے اس کے ہاتھ کو کاٹنے کا حکم جاری فرمایا : اس پر حضرت عثمان کہنے لگے ! بیشک اس کی چوری کردہ چیز کی قیمت دس دراھم کے برابر نہیں، سو حضرت عمر نے اس کے بارے میں حکم دیا تو اس کی قیمت آٹھ دراھم لگائی گئی پس آپ نے اس کا ہاتھ نہیں کاٹا۔

حضرت عمرو بن شعیب فرماتے ہیں کہ میں حضرت سعید بن مسیب کے پاس داخل ہوا اور میں نے ان سے عرض کی ! یقینا آپ کے اصحاب عروہ بن زبیر، محمد بن مسلم زھری اور ابن یسار یہ سب فرماتے ہیں : ڈھال کی قیمت پانچ دراھم ہیں۔ اس پر آپ نے فرمایا : بہر حال اس بارے میں رسول اللہ صلی اللہ علیہ وآلہ وسلم کی سنت گزر چکی ہے وہ دس دراھم ہے۔

حضرت عروہ فرماتے ہیں کہ حضرت عائشہ رضی اللہ عنہا نے ارشاد فرمایا : رسول اللہ صلی اللہ علیہ وآلہ وسلم کے زمانے میں میں حقیر اور گھٹیا چیز کی چوری میں ہاتھ نہیں کاٹا جاتا تھا۔