مصنف ابن ابي شيبه

حضرت ابن طاؤس فرماتے ہیں کہ میں نے اپنے والد حضرت طاؤس سے دریافت کیا : آدمی کو قتل کردیا گیا پس اس نے اپنا خون معاف کردیا ؟ آپ نے فرمایا : جائز ہے۔ میں نے دریافت کیا : چاہے قتل خطاء یا عمد ہو ؟ آپ نے فرمایا : جی ہاں۔

یونس فرماتے ہیں کہ حسن بصری فرمایا کرتے تھے : جب آدمی اپنے مرنے سے پہلے ہی اپنے قاتل کو جو جان بوجھ کر اسے قتل کرتا ہے اس کو معاف کردے تو یہ جائز ہے۔

حضرت قتادہ فرماتے ہیں کہ حضرت عروہ بن مسعود ثقفی نے اپنی قوم کو اللہ اور اس کے رسول (صلی اللہ علیہ وآلہ وسلم) کی طرف دعوت دی تو ان میں سے ایک آدمی نے ان کو تیر مارا جس سے ان کی وفات ہوگئی۔ انہوں نے اس کو معاف کردیا تھا۔ پھر یہ معاملہ نبی کریم صلی اللہ علیہ وآلہ وسلم کی خدمت میں پیش کیا گیا تو آپ صلی اللہ علیہ وآلہ وسلم نے ان کی معافی کو نافذ کیا اور فرمایا : یہ سورة یٰسین میں مذکور شخص کی طرح ہیں۔

حضرت ابن جریج فرماتے ہیں کہ میں نے حضرت عطاء کو یوں فرماتے ہوئے سنا : کہ جس شخص کو غلطی سے قتل کیا گیا اگر اس نے اپنی دیت قاتل کو ھبہ کردی تو اس کی طرف سے یہ ھبہ قاتل کے لیے تہائی دیت میں ہوگا اس لیے کہ یہ بھی مال ہے جس کی اس نے وصیت کی ہے۔

حضرت سماک بن فضل فرماتے ہیں کہ حضرت عمر بن عبدالعزیز نے ارشاد فرمایا : تہائی دیت میں ہوگا۔