مصنف ابن ابي شيبه

حضرت ابن عباس رضی اللہ عنہما فرماتے ہیں کہ رسول اللہ صلی اللہ علیہ وآلہ وسلم نے انصار اور مہاجرین کے درمیان ایک دستاویز لکھی : وہ ان کی زمانہ جاہلیت کی دیت ادا کریں گے اور ان کے قیدیوں کو چھڑائیں گے نیکی اور مسلمانوں کے درمیان اصلاح و درستگی کی نیت سے۔

حضرت شعبی فرماتے ہیں کہ رسو ل اللہ (صلی اللہ علیہ وآلہ وسلم) نے قریش کی دیت قریش پر اور انصار کی دیت انصار پر ڈالی۔

ابراہیم سے مروی ہے کہ رسو ل اللہ (صلی اللہ علیہ وآلہ وسلم) نے دیت کی ادائیگی عصبی رشتہ داروں پر مقرر فرمائی۔

ابراہیم فرماتے ہیں کہ حضرت علی رضی اللہ عنہ اور حضرت زبیر حضرت صفیہ کے آزاد کردہ غلاموں کی ولاء کا معاملہ لے کر حضرت عمر کی خدمت میں حاضر ہوئے تو حضرت عمر نے وراثت کا فیصلہ حضرت زبیر کے حق میں کیا اور دیت حضرت علی رضی اللہ عنہ پر لازم کی۔

حضرت عبدالعزیز بن عمر فرماتے ہیں کہ حضرت عمربن عبدالعزیز کو ایک ایسے آدمی کے بارے میں خط لکھا گیا کہ جس کے آقاؤں نے یوں کہا تھا کہ ہم اس کی طرف سے دیت ادا نہیں کریں گے پس آپ نے قاضی کو خط لکھا کہ وہ ان لوگوں پر دیت لازم کرے اس لیے کہ مجھے یقین ہے کہ وہ اس کی وراثت لینے والے ہیں۔

حضرت جعفر بن برقان فرماتے ہیں کہ حضرت عمر بن عبدالعزیز نے خط لکھا : قرابت و رشتہ داری کو نہیں چھوڑا مگر اس کے موالی نے وہ ہی لوگوں میں اس کی وراثت کے زیادہ حقدار ہیں لہذا ان ہی پر اس کی دیت کا بوجھ ڈالو جیسا کہ وہ اس کے وارث بنتے ہیں۔

حضرت مغیرہ فرماتے ہیں کہ ابراہیم نے ارشاد فرمایا : وراثت رشتہ داروں کے لیے ہوگی اور جنایت کے ضمان آزاد کرنے والے پر لازم ہوں گے۔

حضرت مغیرہ فرماتے ہیں کہ ابراہیم نے ایسے شخص کے بارے میں کہ جس کو اس کی قوم نے اور اس کے باپ کو دوسرے لوگوں نے آزاد کیا۔ آپ نے یوں فرمایا : وہ دونوں رشتہ داری کی وجہ سے ایک دوسرے کے وارث بنیں گے اور ان کی جنایت کا ضمان ان کے آقاؤں کے خاندان پر لازم ہوگا۔

حضرت مغیرہ فرماتے ہیں کہ حضرت حماد نے ارشاد فرمایا : آزاد کردہ غلام کی جنایت کا ضمان اس کے آقا کے خاندان پر لازم ہوگا۔

حضرت خصیف فرماتے ہیں کہ حضرت مجاہد نے ارشاد فرمایا : ایک آدمی حضرت عمر کے پاس آ کر کہنے لگا : ایک آدمی نے میرے ہاتھ پر اسلام قبول کیا پھر اس کی وفات ہوگئی اور اس نے ایک ہزار درہم چھوڑے پس میں اس کی پریشانی سے بچنے کے لیے یہ معاملہ آپ کے سامنے پیش کر رہا ہوں۔ اس پر حضرت عمر نے پوچھا : تمہاری کیا رائے ہے کہ اگر وہ شخص کوئی جنایت کرتا تو اس کا ضمان کس پر لازم ہوتا ؟ اس آدمی نے کہا : مجھ پر آپ نے فرمایا : اس کی وراثت بھی تمہیں ملے گی۔

حضرت جابر فرماتے ہیں کہ حضرت عامر شعبی نے ارشاد فرمایا : دیت ان لوگوں پر لازم ہوگی جن کو وراثت ملتی ہے۔

حضرت ابن جریج فرماتے ہیں کہ میں نے حضرت عطاء سے دریافت کیا : اگر لوگ اپنے آزاد کردہ غلام کی دیت ادا کرنے سے انکار کردیں ؟ حضرت عطاء نے جواب دیا : اگر اس غلام کے گھر والے اور لوگ اس کی دیت ادا کرنے سے انکار کردیں تو وہ اس شخص کا آزاد کردہ غلام شمار ہوگا جس کو مصیبت پہنچی تھی۔

اما م زہری فرماتے ہیں کہ اس بارے میں حضرت عمر نے یوں ارشاد فرمایا : جب آدمی نے کسی آدمی کی مدد کی تو مدد کرنے والا تو اس کی وراثت کا حقدار ہوگا اور اس کے خاندان والوں پر اس کی دیت لازم ہوگی۔

حضرت شعبہ فرماتے ہیں کہ حضرت حکم نے ایسے آدمی کے بارے میں کہ جس نے کسی قوم سے تعلق جوڑ لیا ہو۔ آپ نے یوں ارشاد فرمایا : جب یہ ان لوگوں کی طرف سے دیت بھی ادا کرے تو یہ انہیں میں سے شمار ہوگا۔