مصنف ابن ابي شيبه

حضرت عبداللہ بن محمد بن علی رضی اللہ عنہ فرماتے ہیں کہ حضرت علی رضی اللہ عنہ نے ارشاد فرمایا : جس شخص نے ماں شریک بھائی کو دیت کا وارث نہ بنایا تحقیق اس نے ظلم کیا۔

حضرت عمر ماں شریک بھائیوں کو دیت میں وارث قرار دیتے تھے۔

حضرت شیبانی فرماتے ہیں کہ امام شعبی نے ارشاد فرمایا : ماں شریک بھائی دیت کے وارث بنیں گے اور ہر وارث بھی۔

حضرت حمید فرماتے ہیں کہ حضرت عمر بن عبدالعزیز نے ماں شریک بھائیوں کے بارے میں لکھ دیا تھا کہ وہ دیت کے وارث بنیں گے۔

حضرت ابن جریج فرماتے ہیں کہ میں نے حضرت عطاء سے پوچھا : کیا ماں شریک بھائی وارث بنے گا ؟ یعنی دیت کا ؟ آپ نے فرمایا : جی ہاں۔

حضرت اعمش فرماتے ہیں کہ میں نے ابراہیم سے دریافت کیا کہ کیا ماں شریک بھائی دیت کا وارث بنے گا ؟ آپ نے فرمایا : جی ہاں۔

حضرت عاصم احول فرماتے ہیں کہ میں نے حسن بصری سے اس بارے میں دریافت کیا ؟ آپ نے فرمایا : ان کے لیے کتاب اللہ فیصلہ ہے۔

حضرت عمرو بن دینار فرماتے ہیں کہ حضرت محمد بن علی رضی اللہ عنہ نے ارشاد فرمایا : جس شخص نے ماں شریک بھائی کو دیت کا وارث نہیں بنایا تحقیق اس نے ظلم کیا۔