مصنف ابن ابي شيبه

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے عورت کے پیٹ میں موجود بچہ کو ساقط کرنے کی صورت میں ایک غلام یا باندی کا فیصلہ فرمایا : آپ صلی اللہ علیہ وآلہ وسلم نے جس شخص کے خلاف فیصلہ فرمایا تھا وہ کہنے لگا : کیا اس کی دیت دی جائے گی جس نے نہ کچھ پیا اور نہ ہی کچھ کھایا اور نہ ی وہ زور سے چیخا ؟ اس جیسا خون تو رائیگاں جاتا ہے ؟ اس پر رسول اللہ صلی اللہ علیہ وآلہ وسلم نے ارشاد فرمایا : یقینا یہ شخص تو شاعر جیسی بات کررہا ہے بہر حال پیٹ میں موجود بچہ ہلاک کرنے کی صورت میں غرہ یعنی ایک غلام یا باندی دینا لازم ہے۔

حضرت مسور بن مخرمہ فرماتے ہیں کہ حضرت عمر بن خطاب لوگوں سے عورت کے پیٹ میں موجود بچہ کو ولادت سے پہلے ہلاک کردینے کے بارے میں مشورہ کررہے تھے کہ اس صورت میں کیا دیت ہوگی ؟ تو حضرت مغیرہ بن شعبہ فرمانے لگے : میں نبی کریم صلی اللہ علیہ وآلہ وسلم کے پاس حاضر تھا تو آپ صلی اللہ علیہ وآلہ وسلم نے اس معاملہ میں غرہ یعنی ایک غلام یا باندی کا فیصلہ فرمایا تھا، حضرت عمر نے ان سے فرمایا تم کوئی ایسا شخص لاؤ جو تمہارے ساتھ اس فیصلہ کی گواہی دے تو حصرت محمد بن مسلمہ نے ان کے حق میں گواہی دی۔

حضرت عطاء فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : عورت کے پیٹ میں موجود بچہ ہلاک کردینے کی صورت میں غرہ یعنی ایک غلام یا باندی یا خچر ہوگا۔

حضرت ہشام فرماتے ہیں کہ ان کے والد حضرت عروہ نے ارشاد فرمایا عورت کے پیٹ میں موجود بچہ ہلاک کردینے کی صورت میں ایک غلام یا باندی یا گھوڑا ادا کرنا ہوگا۔

حضرت اشعث فرماتے ہیں کہ امام شعبی نے ارشاد فرمایا کہ غرہ سے مراد ایک غلا م یا باندی ہے جو اس ہلاک ہونے والے بچہ کی ماں یا اس کے قریبی رشتہ دار کو ملے گی۔

حضرت اشعث فرماتے ہیں کہ حضرت ابن سیرین اور حضر ت حکم ان دونوں حضرات نے ارشاد فرمایا : آزاد عورت کے پیٹ میں موجود بچہ ہلاک کردینے کی صورت میں ایک غلام یا باندی دینا ہوگی۔

حضرت محمد بن قیس فرماتے ہیں کہ امام شعبی نے ایسے شخص کے بارے میں جس نے کسی عورت کے پیٹ پر ضرب لگا کر اس کے حمل کو ساقط کردیا ہو۔ آپ نے یوں ارشاد فرمایا : اس شخص پر غرہ یعنی ایک غلام یا باندی لازم ہوگی۔

حضرت لیث فرماتے ہیں کہ حضرت طاؤس اور حضر ت مجاہد ان دونوں حضرات نے ارشاد فرمایا ! غرہ سے مراد غلام یا باندی یا گھوڑا ہے۔

حضرت لیث فرماتے ہیں کہ حضرت طاؤس اور حضر ت مجاہد ان دونوں حضرات نے ارشاد فرمایا ! غرہ سے مراد غلام یا باندی یا گھوڑا ہے۔

حضرت مغیرہ فرماتے ہیں کہ ابراہیم نے ایسی عورت کے بارے میں جس نے دوا پی کر اپنا حمل ساقط کردیا۔ آپ نے یوں فرمایا ! کہ وہ عورت غلام آزاد کرے گی اور اس بچہ کے والد کو غرہ یعنی غلام یا باندی دے گی۔

حضرت جابر بن عبداللہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا : غرہ میں ایک غلام یا باندی ادا کرتے ہیں۔

حضرت جابر فرماتے ہیں کہ حضرت عامر نے ارشاد فرمایا ! ہر حمل کی بنیاد میں ہی غرہ یعنی غلام یا باندی ہے اور حضرت حکم نے فرمایا : حمل کی ابتداء میں تو صلح ہوگی یہاں تک کہ بچہ کی خلقت ظاہر ہوجائے۔ حضرت وکیع نے فرمایا : حضرت حکم کا قول امام شعبی کے قول سے زیادہ پسند یدہ ہے۔