مصنف ابن ابي شيبه

حضرت ابن عباس رضی اللہ عنہما کا ارشاد ہے کہ رسول اللہ صلی اللہ علیہ وآلہ وسلم نے فرمایا کہ یہ اور یہ یعنی چھنگلیا اور انگوٹھا برابر ہیں۔

حضرت شریح نے فرمایا کہ میرے پاس عروۃ البارقی حضرت عمر کی طرف سے یہ پیغام لائے کہ تمام انگلیاں دیت میں برابر ہیں۔

حضرت زید بن ثابت کا ارشاد ہے کہ تمام انگلیاں برابر ہیں۔

حضرت ہشام اپنے والد سے روایت کرتے ہیں کہ یہ تمام برابر ہیں۔

ابراہیم کا ارشاد ہے کہ دیت تمام انگلیوں میں برابر ہے۔

حضرت ابن عدی فرماتے ہیں کہ میں نے اپنی کتاب میں ہشام بن عروہ سے یہ روایت دیکھی ہے کہ حضرت ابن عمر رضی اللہ عنہما اور ابن عباس رضی اللہ عنہما کا ارشاد ہے کہ یہ اور یہ یا انہوں نے فرمایا کہ تمام انگلیاں برابر ہیں۔

حضرت شعب کا ارشاد ہے کہ میں شریح اور مسروق کے بارے میں گواہی دیتا ہوں کہ انہوں نے انگلیوں اور دانتوں کی دیت کو برابر قرار دیا ہے۔

حسن اور محمد فرماتے ہیں کہ تمام انگلیاں برابر ہیں یعنی سب میں دس دس اونٹ دیت ہے۔