مصنف ابن ابي شيبه

اٰل عمر کے ایک آدمی سے مروی ہے کہ آپ صلی اللہ علیہ وآلہ وسلم نے فرمایا کہ زبان میں کامل دیت ہے۔

حضرت زہری سے آپ صلی اللہ علیہ وآلہ وسلم کا ارشاد مروی ہے کہ زبان کو جب جڑ سے اکھاڑ دیا جائے تو اس میں دیت کاملہ ہے۔

حضرت مکحول سے بھی مرفوعاً اسی طرح مروی ہے۔

حضرت علی رضی اللہ عنہ کا ارشاد ہے کہ زبان میں دیت ہے۔

حضرت عبداللہ سے مروی ہے کہ زبان جب جڑ سے اکھاڑ لی جائے تو دیت پانچ حصوں میں ہوگی، اور جو اس سے کم ہو (یعنی جڑ سے نہ اکھڑی ہو) تو اس میں اس کے حساب سے دیت ہوگی۔

حضرت عمر بن عبدالعزیز نے فرمایا ہے کہ زبان میں دیت کا ملہ ہے اور جب زبان کا زخم اتنا بڑھ جائے کہ بات نہ ہوسکے تو اس میں بھی کامل دیت ہوگی۔

ابراہیم کا ارشاد ہے کہ زبان کی جڑ میں (دیت کاملہ ہے)

حسن سے بھی اسی طرح مروی ہے۔

حضرت زید بن ثابت نے فرمایا ہے کہ زبان جب چر جائے پھر اس کا زخم بھر جائے تو بیس اونٹ ہیں۔

حضرت ابن جریج کا ارشاد ہے کہ میں نے عطاء سے سوال کیا کہ زبان ساری کاٹی جائے تو ؟ تو انہوں نے جواب دیا کہ دیت ہوگی۔

حضرت عمرو بن شعیب کا ارشاد ہے کہ حضرت ابوبکر نے زبان جب جڑ سے کٹ جائے تو دیت کاملہ کا اور اگر کٹ جائے اور صاحب لسان بات کرسکے تو آدھی دیت کا فیصلہ فرمایا۔

حضرت جریج نے فرمایا کہ سلیمان بن موسیٰ کا ارشاد ہے کہ عمر بن عبدالعزیز کی کتاب میں ہے کہ جو زبان اتنی کٹ جائے کہ بات کرنے سے عاجز ہو تو اس میں پوری دیت ہے اور جو اس سے کم کٹی ہو تو آدھی دیت ہے۔

حضرت ابن جریج کا ارشاد ہے کہ مجھ کو عبدالعزیز بن عمر نے یہ بات بتائی کہ عمر بن عبدالعزیز کی کتاب میں لکھا ہے کہ عمر سے مروی ہے کہ زبان جب جڑ سے نکل جائے تو اس میں پوری دیت ہے اور زبان کا جو زخم بڑھ جائے کہ بات کرنے سے مانع ہو تو اس میں بھی کامل دیت ہے اور عورت کی زبان میں بھی دیت کاملہ ہے اور عورت کی زبان کا جو زخم بڑھ جائے اور بات کرنے سے مانع ہو تو اس میں بھی دیت کاملہ ہے اور زخم اس سے کم درجہ کا ہو تو اس میں اس کے حساب سے دیت ہوگی۔

حضرت علی رضی اللہ عنہ نے فرمایا کہ زبان میں دیت ہے۔

ابراہیم کا ارشاد ہے کہ زبان میں دیت ہے۔