مصنف ابن ابي شيبه

حضرت مغیرہ فرماتے ہیں کہ ابراہیم نے اللہ رب العزت کے اس قول کے مطابق : ترجمہ : اور وہ لوگ جب خرچ ہیں تو نہ اسراف کرتے ہیں اور نہ بخل کرتے ہیں اور ہوتا ہے ان کا خرچ کرنا ان دونوں کے درمیان اعتدال سے۔ آپ نے فرمایا : نہ وہ ان کو بھوکا رکھتے ہیں اور نہ ان کو لباس سے محروم کرتے ہیں اور نہ ہی ایسے طور پر خرچ کرتے ہیں کہ لوگ کہنے لگے کہ اس نے اس معاملہ میں فضول خرچی کی۔

حضرت منھال فرماتے ہیں کہ حضرت سعید بن جبیر نے اللہ رب العزت کے اس قول کے مطابق : ” اور جو خرچ کردیتے ہو تم کوئی بھی چیز تو وہ اس کی جگہ اور دیتا ہے تم کو اور وہ سب سے بہتر رزق عطا فرمانے والا ہے۔ “ آپ نے فرمایا : یہ صورت اسراف اور کنجوسی کے علاوہ میں ہے۔

حضرت یحییٰ بن جزار فرماتے ہیں کہ حضرت ابو العبید ین نے حضرت ابن مسعود سے فضول خرچی کے متعلق پوچھا : تو آپ نے فرمایا : مال کو حق کے علاوہ جگہ میں خرچ کرنا فضول خرچی ہے۔

داؤد فرماتے ہیں کہ میں نے حسن بصری سے پوچھا : کہ میں نے سال میں اپنی بیوی کے لیے بیس درہم کی خوشبو خریدی کیا یہ اسراف ہے ؟ آپ نے فرمایا : یہ اسراف نہیں ہے۔

حضرت طاؤس فرماتے ہیں کہ حضرت ابن عباس رضی اللہ عنہما نے ارشاد فرمایا : جو چاہو پہنو اور جو چاہو کھاؤ۔ لیکن دو عادتوں سے بچنا ایک فضول خرچی اور دوسری فخر۔

حضرت محمد بن سوقہ فرماتے ہیں کہ حضرت سعید بن جبیر سے کسی آدمی نے مال ضائع کرنے کے متعلق پوچھا ؟ آپ نے فرمایا : مال ضائع کرنا یہ ہے کہ اللہ رب العزت تجھے رزق عطا کریں اور تم اس کو ان کاموں میں خرچ کرو جو اللہ نے تم پر حرام کیے ہیں۔

حضرت عوام فرماتے ہیں کہ حضرت کعب نے ارشاد فرمایا : خرچ کرو، اس کا بدل تمہیں مل جائے گا۔

حضرت عبد اللہ بن مسعود رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : جس نے میانہ روی کی وہ محتاج نہیں ہوا۔

یوسف فرماتے ہیں کہ حضرت ابو السریہ بن حسن نے ارشاد فرمایا : کھانے میں اسراف نہیں ہے۔

حسن بصری فرماتے ہیں کہ رسول اللہ صلی اللہ علیہ وآلہ وسلم کے صحابہ نے آپ صلی اللہ علیہ وآلہ وسلم سے سوال کیا کہ جو ہم اپنے گھر والوں پر خرچ کرتے ہیں اس کی کیا حیثیت ہے ؟ آپ صلی اللہ علیہ وآلہ وسلم نے فرمایا : جو مال تم اپنے گھر والوں پر بغیر اسراف اور بغیر کنجوسی کے خرچ کرتے ہو وہ اللہ کے راستہ میں شمار ہوتا ہے ۔