مصنف ابن ابي شيبه

حضرت ابو سعیدخدری فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : احسان جتلانے والا جنت میں داخل نہیں ہوگا۔

حضرت نافع بن عاصم بیان کرتے ہیں کہ حضرت عبد اللہ بن عمرو رضی اللہ عنہ نے ارشاد فرمایا : احسان جتلانے والا جنت میں داخل نہیں ہوگا۔

حضرت ابو ذر فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا : تین شخص ایسے ہیں کہ اللہ رب العزت قیامت کے دن نہ ان سے بات کریں گے ۔ نہ ان کی طرف رحمت کی نظر سے دیکھیں گے ، نہ ان کو پاک صاف کریں گے اور ان کے لیے دردناک عذاب ہوگا۔ راوی فرماتے ہیں رسول اللہ صلی اللہ علیہ وآلہ وسلم نے تین مرتبہ یہ بات دہرائی۔ حضرت ابو ذر نے فرمایا : یہ لوگ نامراد و خسارے میں ہوئے۔ یا رسول اللہ صلی اللہ علیہ وآلہ وسلم ! وہ کون لوگ ہیں ؟ ّ آپ صلی اللہ علیہ وآلہ وسلم نے فرمایا : تہبند کو لٹکانے والا ، احسان جتلانے والا، اور اپنے سامان کو جھوٹی قسم کے ذریعہ فروخت کرنے والا۔

حضرت عبد اللہ بن عمرو رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : احسان جتانے والا شخص جنت میں داخل نہیں ہوگا۔