مصنف ابن ابي شيبه

حضرت ابوجُری ّ ھجیمی فرماتے ہیں کہ میں رسول اللہ صلی اللہ علیہ وآلہ وسلم کی خدمت میں آیا اور میں نے پوچھا : کیا آپ اللہ کے رسول (صلی اللہ علیہ وآلہ وسلم) ہیں ؟ آپ صلی اللہ علیہ وآلہ وسلم نے فرمایا : جی ہاں ! میں نے عرض کی : یا رسول اللہ صلی اللہ علیہ وآلہ وسلم ! مجھے کوئی وصیت فرما دیجئے۔ آپ صلی اللہ علیہ وآلہ وسلم نے فرمایا : کسی کو گالی مت دو ، آپ فرماتے ہیں : پھر میں نے کسی کو گالی نہیں دی، نہ غلام کو نہ کسی آزاد کو ، نہ کسی بکری اور نہ ہی کسی اونٹ کو۔

حضرت عبداللہ بن عمرو فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا : یقینا اللہ کے نزدیک سب سے بڑا گناہ یہ ہے کہ آدمی اپنے والدین کو گالی دے۔ صحابہ نے عرض کیا : آدمی کیسے اپنے والدین کو گالی دے سکتا ہے ؟ آپ صلی اللہ علیہ وآلہ وسلم نے فرمایا : وہ کسی آدمی کے باپ کو گالی دیتا ہے تو وہ بدلے میں اس کے باپ کو گالی دیتا ہے۔ یہ کسی آدمی کی ماں کو گالی دیتا ہے تو وہ بدلہ میں اس کی ماں کو گالی دیتا ہے۔

حضرت ابو نجیع فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا : بیشک برا سود یہ ہے کہ آدمی اپنے بھائی کی عزت خراب کرنے میں حد سے گزر جائے اور سب سے بڑا گناہ یہ ہے کہ آدمی اپنے والدین کو گالی دے ۔ پوچھا گیا : یا رسول اللہ صلی اللہ علیہ وآلہ وسلم ! کیسے کوئی اپنے والدین کو گالی دے سکتا ہے ؟ آپ صلی اللہ علیہ وآلہ وسلم نے فرمایا : وہ لوگوں کو گالی دیتا ہے تو وہ جواباً اس کے والدین کو گالی دیتے ہیں۔

حضرت عاصم فرماتے ہیں کہ میں نے کبھی حضرت ابو وائل کو گالی دیتے ہوئے نہیں دیکھا مگر حجاج بن یوسف کا ذکر کرتے ہوئے ایک مرتبہ آپ نے کہا : اے اللہ ! تو اس کو خار دار درخت کا کھانا کھلا دے ۔ نہ یہ موٹا ہو اور نہ ہی اس کی بھوک مٹے۔ پھر آپ نے فرمایا : اگرچہ وہ تجھے پسند ہو۔