مصنف ابن ابي شيبه

حضرت ھیثم فرماتے ہیں کہ حضرت عاصم نے چند لوگوں کو دیکھا جو کسی آدمی کے پیچھے چل رہے تھے ۔ آپ نے فرمایا : بیشک یہ فتنہ ہے اس شخص کے لیے جس کے پیچھے چلا جا رہا ہے اور ذلت ہے پیچھے چلنے والوں کے لیے۔

حضرت حبیب بن ابی ثابت فرماتے ہیں کہ کچھ لوگ حضرت ابن مسعود کے پیچھے آئے اور آپ کے پیچھے چلنے لگے، آپ نے پوچھا : کیا تم لوگوں کو کوئی کام ہے ؟ انہوں نے عرض کیا : نہیں، آپ نے فرمایا : واپس لوٹ جاؤ ، اس لیے کہ یہ پیچھے آنے والے کے لیے ذلت ہے اور جس کے پیچھے چلا جا رہا ہے اس کے لئے فتنہ ہے۔

حضرت سلیم بن حنظلہ فرماتے ہیں کہ ہم لوگ حضرت ابی بن کعب کے پاس آئے تاکہ ہم ان کے پاس گفتگو کریں۔ جب آپ اٹھ گئے تو ہم بھی اٹھ کر ان کے ساتھ چلنے لگے۔ پس حضرت عمر ان سے ملے اور ان پر درّہ اٹھایا۔ آپ نے فرمایا : اے امیر المؤمنین ! جان لیں آپ جو کر رہے ہیں ! انہوں نے فرمایا : بیشک یہ جو تم دیکھ رہے ہو یہ متبوع کے لیے فتنہ ہے اور تابع کے لیے ذلت ہے۔

حضرت عاصم فرماتے ہیں کہ حضرت ابن سیرین کسی کو نہیں چھوڑتے تھے کہ وہ ان کے ساتھ چل سکے۔

حضرت عاصم فرماتے ہیں کہ حضرت ابو العالہَ کے پاس جب چار سے زیادہ لوگ بیٹھ جاتے تو آپ کھڑے ہوجاتے۔