مصنف ابن ابي شيبه

حضرت عاصم فرماتے ہیں کہ حضرت زر نے ارشاد فرمایا : کہ میں نے حضرت صفوان بن عسال مرادی کی خدمت میں حاضر ہوا ، آپ نے مجھ سے پوچھا : کس لیے آئے ہو ؟ میں نے عرض کیا علم حاصل کرنے کے لیے۔ آپ نے فرمایا : بلاشبہ ملائکہ اپنے پروں کو طالب علم کے لیے بچھاتے ہیں۔

حضرت سعید بن جبیر فرماتے ہیں کہ حضرت ابن عباس رضی اللہ عنہما نے ارشاد فرمایا : خیر کی بات سکھلانے والے کے لیے ہر چیز دعائے مغفرت کرتی ہے حتی کہ سمندر میں مچھلیاں بھی۔

حضرت عنترہ فرماتے ہیں کہ حضرت ابن عباس رضی اللہ عنہما نے ارشاد فرمایا : کہ کوئی آدمی کسی راستہ پر نہیں چلتا کہ اس میں علم تلاش کرے مگر یہ کہ اللہ رب العزت اس کے لیے جنت کا راستہ آسان فرما دیتے ہیں۔

حضرت عمرو بن قیس فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا؛ کہ علم کی فضیلت عبادت کی فضیلت سے بہتر ہے۔ اور تمہارے دین کی بنیاد تقویٰ ہے۔

حضرت احنف فرماتے ہیں کہ حضرت عمر نے ارشاد فرمایا : علم حاصل کرو قبل ازیں کہ تمہیں سردار بنایا جائے۔

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : جو شخص کسی راستہ پر چلے تاکہ علم حاصل کرے، اللہ رب العزت اس کے لیے جنت کے راستہ کو آسان فرما دیتے ہیں۔

حضرت طاؤس فرماتے ہیں کہ حضرت ابن عباس رضی اللہ عنہما نے ارشاد فرمایا : کہ دو حریص ایسے ہیں جو کبھی سیر نہیں ہوتے : علم کا خواہش مند اور دنیا کا خواہش مند۔

حضرت شقیق فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا : علم حاصل کرو اس لیے کہ کوئی نہیں جانتا کہ وہ کب اس کا محتاج ہوجائے !

حضرت ابو عبیدہ فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا : تو صبح کر عالم بن کر یا سیکھنے والا بن کر، اس کے علاوہ توتیسرابن کر صبح مت کر۔

حضرت سالم بن ابو الجعد فرماتے ہیں کہ حضرت ابو الدرداء نے ارشاد فرمایا : علم سیکھو قبل ازیں کہ علم اٹھا لیا جائے۔ بیشک جاننے والا اور سیکھنے والا دونوں اجر میں برابر ہیں۔

حضرت سالم فرماتے ہیں کہ حضرت ابو الدرداء نے ارشاد فرمایا : علم کا سکھلانے والا اور سیکھنے والا دونوں اجر میں برابر ہیں۔

حضرت ابو الاحوص فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا : کہ بیشک کوئی بھی آدمی عالم بن کر پیدا نہیں ہوتا بیشک علم تو سیکھنے سے حاصل ہوتا ہے۔

حضرت عبد اللہ بن مسعود رضی اللہ عنہ کا مذکورہ ارشاد اس سند سے بھی منقول ہے۔