مصنف ابن ابي شيبه

حضرت ابو رافع فرماتے ہیں کہ حضرت ابوہریرہ نے ارشاد فرمایا : کہ حضرت زینب کا نام برّہ تھا ۔ ان کو کہا گیا کہ تم نے اپنے نفس کی پاکیزگی بیان کی ! پس رسول اللہ صلی اللہ علیہ وآلہ وسلم نے ان کا نام زینب رکھ دیا۔

حضرت نافع فرماتے ہیں کہ حضرت ابن عمر رضی اللہ عنہما نے ارشاد فرمایا : کہ حضر ت عمر کی ایک بیٹی تھی جس کا نام عاصیہ تھا، پس رسول اللہ صلی اللہ علیہ وآلہ وسلم نے اس کا نام جمیلہ رکھ دیا۔

حضرت خیثمہ فرماتے ہیں کہ میرے والد کا نام زمانہ جاہلیت میں عزیز تھا، پس رسول اللہ صلی اللہ علیہ وآلہ وسلم نے ان کا نام عبدالرحمن رکھ دیا۔

حضرت عروہ بن زبیر فرماتے ہیں کہ نبی کریم صلی اللہ علیہ وآلہ وسلم جب کوئی بُرا نام سنتے تو آپ صلی اللہ علیہ وآلہ وسلم اس نام کو اچھے نام سے تبدیل فرما دیتے۔

حضرت کریب فرماتے ہیں کہ حضرت ابن عباس رضی اللہ عنہما نے ارشاد فرمایا کہ حضرت جویریہ کا نام برہ تھا، پس رسول اللہ صلی اللہ علیہ وآلہ وسلم نے ان کا نام تبدیل فرما دیا۔

حضرت عروہ بن زبیر فرماتے ہیں کہ ایک آدمی کا نام حباب تھا پس رسول اللہ صلی اللہ علیہ وآلہ وسلم نے اس کا نام عبد اللہ رکھا اور فرمایا : حباب تو شیطان ہے۔ حضرت عروہ نے فرمایا : ایک آدمی کا نام مضطجع تھا پس رسول اللہ صلی اللہ علیہ وآلہ وسلم نے اس کا نام منبعث رکھا۔

حضرت عامر فرماتے ہیں کہ قریش کے گناہ گاروں اور نافرمانوں میں سے سوائے حضرت مطیع کے کسی نے اسلام کو نہیں قبول کیا اور ان کا نام عاصی تھا پس رسول اللہ صلی اللہ علیہ وآلہ وسلم نے ان کا نام مطیع رکھا۔

حضرت عبد اللہ بن سلام فرماتے ہیں کہ میں رسول اللہ صلی اللہ علیہ وآلہ وسلم کے پاس آیا اور میرا نام عبد اللہ بن سلام نہیں تھا، رسول اللہ صلی اللہ علیہ وآلہ وسلم نے میرا نام عبد اللہ بن سلام رکھا۔

حضرت ھانی بن شریح فرماتے ہیں کہ ایک قوم وفد لے کر نبی کریم صلی اللہ علیہ وآلہ وسلم کے پاس آئی پس آپ صلی اللہ علیہ وآلہ وسلم نے سنا کہ ان لوگوں نے ایک آدمی کو عبد الحجر کے نام سے پکارا ، آپ صلی اللہ علیہ وآلہ وسلم نے اس شخص سے پوچھا : تیرا نام کیا ہے ؟ اس نے کہا : عبد الحجر، تو رسول اللہ صلی اللہ علیہ وآلہ وسلم نے اس سے فرمایا : بیشک تم تو عبداللہ (اللہ کے بندے) ہو۔