مصنف ابن ابي شيبه

حضرت عمرو فرماتے ہیں کہ حضرت عکرمہ نے ارشاد فرمایا : جب تم ایسے گھر میں داخل ہو جس میں کوئی نہ ہو تو تم یوں کہو : (السَّلاَمُ عَلَیْنَا وَعَلَی عِبَادِ اللہِ الصَّالِحِینَ ) سلامتی ہو ہم پر اور اللہ کے نیک بندوں پر۔

حضرت نافع فرماتے ہیں کہ حضرت ابن عمر رضی اللہ عنہما نے اس آدمی کے بارے میں جو کسی گھر یا مسجد میں داخل ہو اور وہاں کوئی نہ ہو یوں ارشاد فرمایا : کہ وہ شخص یوں کہے۔ (السَّلاَمُ عَلَیْنَا وَعَلَی عِبَادِ اللہِ الصَّالِحِینَ ) ۔

ابراہیم فرماتے ہیں کہ تم یہ کہو : ہم پر اور اللہ کے نیک بندوں پر سلامتی ہو۔

حضرت ابو سنان فرماتے ہیں کہ حضرت ماھان نے اللہ رب العزت کے اس قول : { فَإِذَا دَخَلْتُمْ بُیُوتًا فَسَلِّمُوا عَلَی أَنْفُسِکُمْ تَحِیَّۃً مِنْ عِنْدِ اللہِ مُبَارَکَۃً طَیِّبَۃً } کے بارے میں یوں ارشاد فرمایا : کہ وہ آدمی یوں سلام کرے : (السَّلاَمُ عَلَیْنَا مِنْ رَبِّنَا) ہم پر ہمارے رب کی طرف سے سلامتی ہو۔

حضرت عبدالکریم فرماتے ہیں کہ حضرت مجاہد یوں فرماتے تھے : السَّلاَمُ عَلَیْنَا، وَعَلَی عِبَادِ اللہِ الصَّالِحِینَ ۔

حضرت عبد الکریم فرماتے ہیں کہ حضرت مجاہد نے ارشاد فرمایا : جب تم کسی گھر میں داخل ہو جہاں کوئی بھی نہ ہو تو تم یوں کہو : ” اللہ کے نام کے ساتھ داخل ہوتا ہوں ۔ سب تعریفیں اللہ کے لیے ہیں۔ ہم پر اور اللہ کے نیک بندوں پر سلامتی ہو۔ “

حضرت عبد الملک فرماتے ہیں کہ حضرت عطاء نے ارشاد فرمایا : جب گھر میں کوئی نہ ہو تو یوں کہا کرو۔ السلام علینا من ربنا۔ ہم پر ہمارے رب کی طرف سے سلامتی ہو۔