مصنف ابن ابي شيبه

حضرت ابو بردہ فرماتے ہیں کہ میں مدینہ کی مسجد میں داخل ہوا تو حضرت عبد اللہ بن سلام بیٹھے ہوئے تھے، تو میں نے سلام کیا پھر میں بیٹھ گیا۔ اس پر آپ نے فرمایا : اے میرے بھتیجے ! تم بیٹھ گئے اور ہمارا تو اٹھنے کا ارادہ ہے۔

حضرت اشعث ایک آدمی سے نقل کرتے ہیں کہ ایک شخص حسن کے پاس بیٹھ گیا، تو آپ نے اس سے کہا : تم ہمارے اٹھنے کے وقت ہمارے پاس بیٹھ گئے ہو، تمہاری طرف سے اجازت ہے ! اٹھنے کی ؟

حضرت عمران فرماتے ہیں کہ حضرت ابو مجلز نے ارشاد فرمایا : جب کوئی شخص قصداً تمہارے پاس بیٹھے تو تم اس سے اجازت لینے سے پہلے مت اٹھو۔

ابراہیم سے مذکورہ ارشاد اسی سند سے منقول ہے۔

حضرت انس بن مالک رضی اللہ عنہ فرماتے ہیں کہ کوئی بھی آدمی رسول اللہ صلی اللہ علیہ وآلہ وسلم کے پاس نہیں بیٹھا یہاں تک کہ وہ کھڑا ہوتا تو آپ کھڑے ہوتے ۔

حضرت ابن عون فرماتے ہیں کہ محمد اس بات میں کوئی حرج نہیں سمجھتے تھے کہ جب کوئی آدمی کسی آدمی کے پاس بیٹھے تو وہ بغیر اجازت کے کھڑا ہوجائے ۔

حضرت موسیٰ بن نافع فرماتے ہیں کہ میں حضرت سعید بن جبیر کے پاس بیٹھا ہوا تھا جب آپ نے اٹھنے کا ارادہ کیا تو فرمایا : تم لوگ میرے پاس بیٹھے ہوئے ہو، کیا تمہاری اجازت ہے ؟