مصنف ابن ابي شيبه

حضرت سماک بن یزید فرماتے ہیں کہ حضرت علی رضی اللہ عنہاپنی داڑھی کے اس حصہ سے بال اتارتے تھے جو حصہ ان کے چہرہ سے ملا ہوا تھا۔

حضرت ابو زرعہ فرماتے ہیں کہ حضرت ابوہریرہ اپنی داڑھی کو مٹھی میں پکڑتے تھے، پھر جو حصہ مٹھی سے زائد ہوتا اس کو کاٹ دیتے۔

حضرت منصور فرماتے ہیں کہ میں نے حضرت عطاء بن ابی رباح کو فرماتے ہوئے سنا کہ صحابہ پسند کرتے تھے کہ وہ اپنی داڑھیوں کو بڑھائیں سوائے حج یا عمرے میں، اور ابراہیم اپنے داڑھی کے کنارے چھانٹ لیتے تھے۔

حضرت ابن طاؤس فرماتے ہیں کہ ان کے والد حضرت طاؤس اپنی داڑھی کو چھانٹ لیتے تھے اور وہ اس میں رعایت نہیں کرتے تھے۔

حضرت اشعث فرماتے ہیں کہ حسن نے ارشاد فرمایا : صحابہ ایک قبضہ سے زیادہ داڑھی میں رخصت دیتے تھے کہ اس کو چھانٹ لیا جائے ۔

حضرت افلح فرماتے ہیں کہ حضرت قاسم جب اپنا سر منڈواتے تو اپنی داڑھی اور مونچھ کو بھی چھانٹ لیتے تھے۔

حضرت نافع فرماتے ہیں کہ حضرت ابن عمر رضی اللہ عنہما ایک قبضہ سے زائد داڑھی کو چھانٹ لیتے تھے اور حضرت وکیع نے یہ الفاظ بیان فرمائے کہ جب داڑھی قبضہ سے تجاوز کر جاتی تو ا س کو چھانٹ لیتے۔

حضرت قتادہ فرماتے ہیں کہ حضرت جابر نے ارشاد فرمایا : ہم داڑھی کی لمبائی کو سوائے حج یا عمرے کے نہیں چھانٹتے تھے ۔

حضرت ابو زرعہ فرماتے ہیں کہ حضرت ابوہریرہ کی داڑھی جب ایک قبضہ سے تجاوز کر جاتی تو وہ اس کو چھانٹ لیتے تھے۔

حضرت ابو ھلال فرماتے ہیں کہ میں نے حسن بصری اور حضرت ابن سیرین دونوں حضرات سے اس بارے میں پوچھا : تو ان دونوں حضرات نے فرمایا : اس میں کوئی حرج نہیں ہے کہ تم اپنی داڑھی کی لمبائی کو چھانٹ لو۔

حضرت منصور فرماتے ہیں کہ ابراہیم نے ارشاد فرمایا : صحابہ ٹھوڑی کے نیچے کے بال چھانٹ لیتے تھے اور داڑھی کے کناروں کے بال بھی چھانٹتے تھے۔