مصنف ابن ابي شيبه

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : ایمان کے ساٹھ سے اوپر دروازے ہیں، یا فرمایا : ایمان کے ستر سے کچھ اوپر دروازے ہیں۔ ان میں سب سے عظیم ترین ! لا الہ الا اللّٰہ کا کہنا ہے۔ اور سب سے ادنی ترین ! راستہ سے تکلیف دہ چیز کا ہٹا دینا ہے۔ اور حیا بھی ایمان کا ایک شعبہ ہے۔

حضرت سالم اپنے والد سے نقل فرماتے ہیں کہ نبی کریم صلی اللہ علیہ وآلہ وسلم نے ایک آدمی کو سنا کہ وہ اپنے بھائی کو حیا کے بارے میں نصیحت کر رہا تھا۔ اس پر آپ صلی اللہ علیہ وآلہ وسلم نے ارشاد فرمایا : حیاء ایمان میں سے ہے۔

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : حیا ایمان کا ایک شعبہ ہے۔

حضرت اشج بنو عصر فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : بیشک تمہارے میں دو خصلتیں ایسی ہیں اللہ جن سے محبت فرماتے ہیں۔ راوی کہتے ہیں : میں نے پوچھا : وہ دونوں کیا ہیں ؟ آپ صلی اللہ علیہ وآلہ وسلم نے فرمایا : عجز و انکساری اور حیا۔ میں نے پوچھا : یہ پرانی ہیں یا جدید ؟ آپ صلی اللہ علیہ وآلہ وسلم نے فرمایا : نہیں بلکہ پرانی ہیں، میں نے کہا : سب تعریفیں اس اللہ کے لیے ہیں جس نے میری فطرت میں دو خصلتیں رکھیں جو اللہ کو محبوب ہیں۔

حضرت عمران بن حصین فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : حیا ساری کی ساری بھلائی ہے۔

حضرت میمون بن ابی شبیب فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : بیشک اللہ حیا دار، بردبار، سفید پوش کو پسند فرماتے ہیں۔ اور فحش کلام کرنے والے، اور لوگوں سے چمٹ کر مانگنے والے کو مبغوض رکھتے ہیں۔

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : حیاء ایمان میں سے ہے۔ اور ایمان جنت میں ہوگا۔ اور بد گوئی

حضرت ابو سعید خدری فرماتے ہیں کہ رسول اللہ صلی اللہ علیہ وآلہ وسلم زیادہ حیا دار تھے باکرہ عورت سے اس کی شرم میں ۔ اور جب آپ صلی اللہ علیہ وآلہ وسلم کسی چیز کو ناپسند سمجھتے تو ہم آپ صلی اللہ علیہ وآلہ وسلم کے چہرے میں اس کے اثرات پہچان لیتے۔

حضرت قیس فرماتے ہیں کہ حضرت عیینہ نے نبی کریم صلی اللہ علیہ وآلہ وسلم کے پاس آنا چاہا تو آپ صلی اللہ علیہ وآلہ وسلم ان کو اجازت نہیں دی۔ حضرت عائشہ رضی اللہ عنہا نے پوچھا : اے اللہ کے رسول (صلی اللہ علیہ وآلہ وسلم) ! یہ کون شخص ہے ؟ آپ صلی اللہ علیہ وآلہ وسلم نے فرمایا : یہ بیوقوف ہے جس کی قوم میں اطاعت کی جاتی ہے۔ پھر آپ صلی اللہ علیہ وآلہ وسلم کے پاس پینے کی کوئی چیز لائی گئی آپ صلی اللہ علیہ وآلہ وسلم نے اس کو چھپا کر نوش فرمایا، تو وہ شخص کہنے لگا : یہ کیا طریقہ ہے ؟ اے اللہ کے رسول (صلی اللہ علیہ وآلہ وسلم) ! آپ صلی اللہ علیہ وآلہ وسلم نے فرمایا : یہ حیا ان کے درمیان ایک خصلت ہے جو ان لوگوں کو عطا کی گئی ہے۔ اور تمہیں اس سے محروم رکھا گیا ہے۔

حضرت ابو مسعود فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : آخری بات جو لوگوں نے کلام نبوت سے حاصل کی وہ یہ ہے : جب تم حیا نہ کرو تو جو چاہے کرو۔

حضرت سعید بن مسیب فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : حیا کا تھوڑا ہونا کفر ہے۔

حضرت سعید بن جبیر فرماتے ہیں کہ حضرت ابن عمر رضی اللہ عنہما نے ارشاد فرمایا : یقینا حیا اور ایمان دونوں اکھٹے ملے ہوئے ہیں، پس جب ان میں سے ایک اٹھتا ہے تو دوسرا بھی اٹھ جاتا ہے۔

حضرت حصین فرماتے ہیں کہ حضرت بکر نے ارشاد فرمایا : حیاء ایمان میں سے ہے اور ایمان جنت میں ہوگا۔ بےحیائی جفا ہے اور جفا جہنم میں لے جاتی ہے۔

حضرت سالم فرماتے ہیں کہ حضرت سعید بن جبیر کہ سورة آل عمران کی آیت میں سَیِّدًا سے مراد بردبار ہے۔

حضرت یزید بن طلحہ بن رکانہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : بیشک ہر چیز کا کوئی نہ کوئی خلق ہوتا ہے اورا یمان کا خلق حیا ہے۔

حسن فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : حیا کی ایک قسم کمزوری کا سبب ہے اور ایک قسم اللہ کی طرف سے ملنے والی عزت کا سبب ہے۔