مصنف ابن ابي شيبه

حضرت ابن ابی اوفی سے روایت ہے وہ کہتے ہیں کہ میں نے جناب رسول اللہ صلی اللہ علیہ وآلہ وسلم کے ہمراہ سات غزوات میں شرکت کی۔ ہم (اس دوران) ٹڈی کھاتے تھے۔

حضرت شبیب، حضرت جندب کے بارے میں روایت کرتے ہیں کہ انہوں نے حضرت ابن عباس رضی اللہ عنہما سے ٹڈی کھانے کے بارے میں سوال کیا ؟ تو حضرت ابن عباس رضی اللہ عنہما نے فرمایا : اس میں کوئی حرج والی بات نہیں ہے۔

حضرت نافع، حضرت ابن عمر رضی اللہ عنہما کے بارے میں روایت کرتے ہیں کہتے ہیں کہ حضرت عمر کے پاس مقام ربذہ میں ٹڈی کا ذکر کیا گیا تو انہوں نے فرمایا : مجھے تو یہ بات پسند ہے کہ میرے پاس ٹڈی کے ایک یا دو ٹوکرے ہوں۔

حضرت حسن بن عبید اللہ سے روایت ہے وہ کہتے ہیں کہ میں نے ابراہیم کو کہتے سُنا کہ حضرات امہات المؤمنین g، باہم ایک دوسرے کو ٹڈی، ہدیہ میں دیا کرتی تھیں۔

حضرت حسن بن سعد، اپنے والد سے روایت کرتے ہیں کہ وہ حضرت علی رضی اللہ عنہ کے لئے ٹڈی، صاف کرتے تھے، پھر حضرت علی رضی اللہ عنہ اس کو کھاتے تھے۔

حضرت داؤد بن ابی ہند سے روایت ہے وہ کہتے ہیں کہ میں نے حضرت سعید بن مسیب سے ٹڈی کے بارے میں سوال کیا ؟ تو انہوں نے فرمایا : ٹڈی کو حضرت عمر ، حضرت مقداد بن اسود اور حضرت صہیب اور حضرت عبد اللہ بن عمر رضی اللہ عنہما نے کھایا ہے۔ راوی کہتے ہیں اور حضرت عمر نے یہ بھی فرمایا : مجھے یہ بات پسند ہے کہ میرے پاس ایک ٹوکرا یا دو ٹوکرے ہوں۔

حضرت ابو وائل ، حضرت ابن عمر رضی اللہ عنہما کے بارے میں روایت کرتے ہیں کہ ٹڈی کا ذکر کیا گیا تو حضرت عمر نے فرمایا : مجھے یہ بات پسند ہے کہ ہمارے پاس ٹڈی کا ایک ٹوکرا یا دو ٹوکرے ہوں۔

حضرت عمر کے بارے میں ایک اور روایت بھی ایسی منقول ہے۔

حضر ت ابن عباس رضی اللہ عنہما سے روایت ہے کہ حضرت عمر ٹڈی کو کھایا کرتے تھے۔

حضرت ابن عمر رضی اللہ عنہما سے روایت ہے وہ کہتے ہیں کہ میں نے حضرت عمر کو دیکھا کہ آپ نے فرمایا : مجھے بھنی ہوئی ٹڈی کھانے کو دل کر رہا ہے۔

حضرت مثنی بن سعد سے روایت ہے وہ کہتے ہیں کہ میں نے حضرت جابر بن زید کو کہتے سُنا : مجھے ثرید کے (بھرے) پیالہ سے زیادہ ٹڈی سے (بھرا) پیالہ محبوب ہے۔

حضرت جعفر سے روایت ہے وہ کہتے ہیں کہ میں نے اپنے والد کو ٹڈی کھاتے ہوئے دیکھتا تھا۔

حضرت اخضر بن عجلان سے روایت ہے وہ کہتے ہیں کہ میں نے حضرت سعید بن جُبیر سے ٹڈی کے بارے میں سوال کیا ؟ انہوں نے فرمایا : تم اس کو زیتون میں بھون کر کھاؤ۔

حضرت عبد الملک بن حارث، اپنے والد سے روایت کرتے ہیں کہ حضرت علی رضی اللہ عنہ سے ٹڈی کے بارے میں سوال کیا گیا ؟ تو آپ نے فرمایا : یہ سمندر کے شکار کی طرح بالکل پاکیزہ ہے۔

حضرت ہشام، حسن کے بارے میں روایت کرتے ہیں، کہتے ہیں کہ حسن ٹڈی کھانے میں کوئی حرج نہیں دیکھتے تھے۔