مصنف ابن ابي شيبه

حضرت عائشہ رضی اللہ عنہا سے روایت ہے۔ وہ کہتی ہیں کہ جناب رسول اللہ صلی اللہ علیہ وآلہ وسلم کو شہد محبوب تھا اور آپ صلی اللہ علیہ وآلہ وسلم کو میٹھا محبوب تھا۔

حضرت زہری سے روایت ہے کہ جناب رسول اللہ صلی اللہ علیہ وآلہ وسلم کو سب سے زیادہ محبوب ٹھنڈا اور میٹھا مشروب تھا۔

حضرت علی رضی اللہ عنہ بن سلیم سے روایت ہے ۔ وہ کہتے ہیں کہ میں نے حضرت انس کو فرماتے سُنا۔ میں خوب میٹھی طلاء نوش کرتا ہوں۔

حضرت ابن جریج سے روایت ہے کہ جناب نبی کریم صلی اللہ علیہ وآلہ وسلم سے سوال کیا گیا۔ آپ کو کون سا مشروب سب سے زیادہ محبوب ہے ؟ آپ صلی اللہ علیہ وآلہ وسلم نے ارشاد فرمایا : ” ٹھنڈا میٹھا “۔

حضرت عبد اللہ بن دینار، حضرت ابن عمر رضی اللہ عنہما کے بارے میں روایت کرتے ہیں کہ ان کے لئے شام کے وقت ایک مشکیزہ میں کشمش کی نبیذ تیار کی جاتی تھی جس کو وہ صبح کے وقت نوش فرماتے تھے۔ اور (اسی طرح) صبح کے وقت آپ کے لئے نبیذ تیار کی جاتی تھی جس کو آپ شام کے وقت نوش فرماتے تھے۔

حضرت بنانہ سے روایت ہے ۔ وہ کہتی ہیں کہ میں حضرت عثمان کے لئے شام کے وقت کشمش کی نبیذ تیار کرتی تھی۔ چناچہ آپ اس کو کھاتے بھی تھے اور پیتے بھی تھے۔

حضرت جابر، حضرت محمد بن علی، حضرت عامر اور حضرت عطاء کے بارے میں روایت کرتے ہیں کہ یہ تینوں حضرات فرماتے ہیں ۔ اس بات میں کوئی حرج نہیں ہے کہ صبح کے وقت کشمش کی نبیذ بنائی جائے اور شام کے وقت نوش کرلی جائے۔

ابراہیم سے روایت ہے ۔ وہ کہتے ہیں ۔ کشمش کی نبیذ میں کوئی حرج نہیں ہے۔ حضرت سفیان کہتے ہیں۔ جب تک یہ نبیذ جوش نہ مارے۔

حسن سے روایت ہے۔ وہ کہتے ہیں کہ کشمش کی نبیذ میں کوئی حرج نہیں ہے۔

حضرت ابن عباس رضی اللہ عنہما سے روایت ہے۔ وہ فرماتے ہیں ۔ نبیذ وہی ہے جو زیادہ پڑی رہنے سے خراب ہوجائے ۔ اور جو مشروب بھی زیادہ دیر رہنے سے زیادہ بہترہو جائے تو اس میں بھی کوئی خیر نہیں ہے۔

حضرت عمر بن عبد العزیز سے بھی ایسی ہی روایت منقول ہے۔