مصنف ابن ابي شيبه

ابراہیم سے روایت ہے ۔ کہتے ہیں کہ حضرات اہل علم مسہل دوائی لینے میں کوئی حرج نیں و سمجھتے تھے۔ راوی کہتے ہیں ۔ صرف اسی وجہ سے کچھ اہل علم اس کو ناپسند کرتے تھے کہ کہیں یہ مسہل دواء آدمی کو کمزور نہ کر دے۔

حضرت عطاء سے روایت ہے ۔ کہتے ہیں کہ احرام باندھے ہوئے آدمی کے لئے دست آور دواء استعمال کرنے میں کوئی حرج نہیں ہے۔

حضرت شعبی سے روایت ہے۔ کہتے ہیں کہ رسول اللہ صلی اللہ علیہ وآلہ وسلم فرمایا کرتے تھے۔ ” بہترین دواء وہ ہے جو منہ کے گوشہ میں ڈال کر استعمال کی جائے اور وہ دواء جو ناک کے راستے سے لی جائے اور مسہل دواء اور پچھنے لگوانا اور عَلَق ۔ جونک لگانا ۔ ہے۔

حضرت شعبی نے نبی کریم صلی اللہ علیہ وآلہ وسلم سے اسی کے مثل روایت کی ہے۔

حضرت اسماء بنت عمیس سے روایت ہے ۔ کہتی ہیں کہ رسول اللہ صلی اللہ علیہ وآلہ وسلم نے (مجھ سے) پوچھا۔ ” تم کس چیز سے جُلاب لیتی تھی۔ ؟ “ میں نے جواب دیا۔ شُبُرم کے ذریعہ۔ آپ صلی اللہ علیہ وآلہ وسلم نے فرمایا۔ یہ تو گرم کھینچنے والی چیز ہے “۔ پھر میں نے سَنَا کے ذریعہ جلاب لیئے تو آپ صلی اللہ علیہ وآلہ وسلم نے ارشاد فرمایا۔ ” اگر موت سے کوئی چیز شفاء دیتی تو سنا ہوتی “۔ یا فرمایا : ” سنا موت سے بھی شفا ہے “۔