مصنف ابن ابي شيبه

حضرت زید بن ثابت رضی اللہ عنہ سے مروی ہے کہ آنحضرت صلی اللہ علیہ وسلم نے عمری والے مکان کو ورثاء کے لئے قرار دیا۔ ( العمری بولتے ہیں کہ آدمی اپنا گھر کسی کو دے دے پھر جب دینے والا فوت ہوجائے تو وہ گھر ورثاء کی طرف لوٹ آتا ہے۔ زمانہ جاہلیت میں لوگ اس طرح کیا کرتے تھے۔ )

حضرت طارق نے حضرت جابر رضی اللہ عنہ کی روایت کی بناء پر عمری والے مکان کا وارثوں کے لئے فیصلہ فرمایا۔

نبی کریم صلی اللہ علیہ وسلم نے ارشاد فرمایا : عمری کی کوئی حیثیت نہیں ہے۔ جو گھر کسی کے حوالے کر دے وہ اسی کیلئے ہوگا۔

نبی کریم صلی اللہ علیہ وسلم نے ارشاد فرمایا : عمری والا مکان جائز ہے، اس کے لئے جس نے اس کو عمری کے طور پر دیا ہے۔

نبی کریم صلی اللہ علیہ وسلم نے ارشاد فرمایا : عمری والا مکان اس میں رہنے والے کی میراث ہے یا پھر جائز فرمایا۔

نبی کریم صلی اللہ علیہ وسلم نے ارشاد فرمایا : اپنے اموال کو اپنے پاس ہی رکھو ان کو عمری نہ بناؤ، جو مکان کو عمری بنائے وہ میراث کے راستہ پر ہے۔

نبی کریم صلی اللہ علیہ وسلم نے ارشاد فرمایا : جس کو عمری کے طور پر کوئی مکان مل گیا تو وہ اسی کا ہے اور اس کی وفات کے بعد اس کے ورثاء کا۔

نبی کریم صلی اللہ علیہ وسلم نے ارشاد فرمایا : عمری میں بھی میراث جاری ہوگی۔

حضرت سلمہ بن کھیل فرماتے ہیں کہ ہم حضرت شریح کی خدمت میں بیٹھے ہوئے تھے، لوگ ان کے پاس عمری والے مکان کے لئے جو ایک شخص نے زندگی کے لئے وقف کیا ہوا تھا ، آئے، آپ نے فرمایا : یہ اس کا مالک ہے اس کی زندگی اور اس کے مرنے ے بعد بھی، جس کے خلاف فیصلہ ہوا تھا وہ جھگڑا اور ہجو کرتے ہوئے آپ کی طرف متوجہ ہوا۔ حضرت شریح نے فرمایا : اس شخص نے میری ایسے فیصلہ میں ملامت کی ہے جو حضور اس سے قبل کرچکے ہیں۔

نبی کریم صلی اللہ علیہ وسلم نے ارشاد فرمایا : جس کو کوئی مکان عمری کے طور پر مل جائے تو وہ اس کا ہے۔ وہ جو چاہے اس مکان کے ساتھ کرسکتا ہے۔

حضرت علی رضی اللہ عنہ نے ارشاد فرمایا : عمری والا مکان بھی گھریلو سامان کی طرح ہی ہے (یعنی یہ بھی ملکیت ہے) ۔

حضرت ابن عمر رضی اللہ عنہما کے پاس ایک اعرابی آیا اور عرض کیا : میں نے اپنے بھتیجے کو ایک اونٹنی کا بچہ دیا تھا اس کی زندگی بھر کے لئے، اس نے اس کو پالا یہاں تک کہ اب وہ بڑا اونٹ بن گیا ہے، آپ کی اس کے بارے میں کیا رائے ہے ؟ فرمایا وہ زندگی اور مرنے کے بعد بھی اسی کے لئے ہے۔ اعرابی نے کہا پھر میں نے اس کو صدقہ کردیا۔ فرمایا : پھر تو یہ پہلے سے بھی زیادہ تجھ سے دور ہوگی۔ (یعنی واپسی کی کوئی راہ نہیں ہے)

حضرت مغیرہ فرماتے ہیں کہ میں نے ابراہیم سکنی (رہائشی مکان) کے متعلق سوال کیا ؟ آپ نے جواب دیا ک ہ وہ گھر اس شخص کے ورثاء کو ملے گا جس نے رہنے کے لیے دیا تھا میں۔ میں نے عرض کیا : اے ابو عمران کیا مسئلہ یوں نہیں ہے ؟ کہ جو کسی چیز کا زندگی کے لئے مالک بنا وہ اس کی زندگی اور مرنے کے بعد بھی مالک رہے گا ؟ آپ نے فرمایا یہ عمری کے بارے میں ہے۔

حسن فرماتے ہیں جب کوئی شخص کسی کو زندگی بھر کے لئے گھر دے، وہ زندگی اور مرنے کے بعد بھی اسی کا ہے۔

حضرت شریح کے پاس ایک نابینا شخص باندی کے متعلق (اس کو عمری بنایا تھا) جھگڑا کرتے ہوئے آیا، حضرت شریح نے جس نے اس کو عمری بنایا تھا اس کے حق میں فیصلہ فرمایا ، اس شخص نے کہا آپ نے میرے خلاف فیصلہ کیا ؟ آپ نے فرمایا : میں نے تیرے خلاف فیصلہ نہیں دیا بلکہ آنحضرت صلی اللہ علیہ وسلم نے فیصلہ فرما دیا تھا : جو زندگی بھر کے لئے کسی چیز کا مالک بنے وہ زندگی اور مرنے کے بعد اسی کی ہے۔

حضرت شعبی رحمہ اللہ نے فرمایا جب کسی نے یہ کہہ کر مکان دوسرے کو دیا کہ یہ تازندگی اب تیرا ہے تو یہ مکان مرنے کے بعد بھی اسی کا ہوگا۔

حضرت ابن عباس رضی اللہ عنہما نے ارشاد فرمایا : جس شخص کو عمری کے طور پر کوئی مکان مل گیا تو وہ گھر اس کا اور اس کے ورثاء کے لئے ہے۔

آنحضرت صلی اللہ علیہ وسلم نے ارشاد فرمایا : اے انصار کے لوگو ! اپنے مکانوں میں رہو ان کو عمری نہ بناؤ، جو شخص کسی چیز کو عمری بنا دے تو وہ اس شخص کا ہی ہوگا کہ جس کو عمری کے طور پردے دیا گیا۔

نبی کریم صلی اللہ علیہ وسلم نے ارشاد فرمایا : عمری والا مکان اس میں رہنے والوں کے لیے استعمال کرنا جائز ہے۔

حضرت جابر رضی اللہ عنہ سے مروی ہے کہ نبی کریم صلی اللہ علیہ وسلم نے عمری کا فیصلہ اس کے لئے فرمایا اور عقبہ کے لئے، دینے والے کے لئے، اس میں کوئی شرط اور استثناء نہیں ہے۔

نبی کریم صلی اللہ علیہ وسلم نے ارشاد فرمایا : عمری والا مکان ورثاء کے لئے نافذ ہے۔