مصنف ابن ابي شيبه

حضرت شریح اور حضرت عبد اللہ فرماتے ہیں کہ اگر کوئی شخص کسی قوم کی جگہ پر بغیر اجازت تعمیر کر دے، تو اس کو توڑا جائے گا، اور اگر اس نے ان کی اجازت سے بنایا ہے تو پھر اس کو نفقہ دیا جائے گا۔

حضرت علی رضی اللہ عنہ سے اسی طرح مروی ہے۔

حضرت شریح فرماتے ہیں کہ جو شخص کسی قوم کی جگہ پر ان کی اجازت کے بغیر تعمیر کرلے تو اس کو توڑا جائے گا، اور ان کی اجازت سے بنایا تھا تو اس کو نفقہ دیا جائے گا۔

حضرت زکریا فرماتے ہیں کہ میں نے حضرت عامر سے دریافت کیا کہ : ایک شخص نے اپنے پڑوسی کی دیوار کرایہ پر لے کر اس پر تعمیر کردی، پھر وہ پڑوسی اس کو اکھاڑنا چاہتا ہے ؟ آپ نے فرمایا : صاحب دیوار کو جتنا اسکا خرچ آیا وہ ادا کرے گا۔

ابراہیم فرماتے ہیں کہ حضرت شریح نے دیوار کے مالک سے فرمایا : اس کی تعمیر کو اکھاڑ دو (اکھاڑ سکتے ہو) ۔

حضرت قتادہ اور حضرت ابو ہاشم فرماتے ہیں کہ جو شخص پہلے کسی کو تعمیر کرنے کی اجازت دے پھر اس کو نکالنا چاہے تو اس کو تعمیر کی قیمت ادا کرنی ہوگی۔

حضرت اشعث فرماتے ہیں کہ ایک شخص نے دوسرے کو دیوار کرایہ پر دی اور اس نے اس پر تعمیر کردی، حضرت شریح نے دیوار والے سے فرمایا : اس کو نفقہ دو ۔