مصنف ابن ابي شيبه

حضرت ابوہریرہ رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا : بیشک جھوٹی قسم ساز و سامان کے زوال کا اور کمائی میں بےبرکتی کا سبب ہے۔

نبی کریم صلی اللہ علیہ وسلم نے ارشاد فرمایا : زیادہ قسم اٹھانے سے بچو، بیشک اس کی وجہ سے شروع میں مال کچھ بڑھتا ہے پھر کم ہوجاتا ہے۔

نبی کریم صلی اللہ علیہ وسلم نے ارشاد فرمایا : بیع میں زیادہ قسمیں اٹھانے سے بچو، بیشک اس کی وجہ سے پہلے مال بظاہر بڑھتا ہے پھر کم ہوجاتا ہے۔

حضرت زاذان فرماتے ہیں کہ حضرت علی رضی اللہ عنہ بازار آتے تو سلام کرتے اور فرماتے ، اے تاجرو ! بیع میں زیادہ قسمیں اٹھانے سے بچو، بیشک اس کی وجہ سے سامان تو بک جاتا ہے لیکن برکت ختم ہوجاتی ہے۔

حضرت ابن مسعود رضی اللہ عنہارشاد فرماتے ہیں کہ قسم اٹھانا بیوع کو بڑھانے اور کسب کو ختم کرنے کا سبب ہے۔

حضرت قیس رحمہ اللہ فرماتے ہیں کہ ہم لوگ مدینہ میں تجارت کرتے تھے، اور ہم اپنے آپ کو سماسر . کے نام سے پکارتے تھے، پھر آنحضرت صلی اللہ علیہ وسلم ہمارے پاس تشریف لائے اور ہمیں اس سے اچھے نام سے پکارا جس سے ہم اپنے آپ کو پکارتے تھے، آپ صلی اللہ علیہ وسلم نے ارشاد فرمایا : اے تاجرو ! اس کاروبار میں لغو کام اور قسم اٹھائی جاتی ہے، پس اس کی تلافی صدقہ کے ساتھ کرو۔

نبی کریم صلی اللہ علیہ وسلم سے اسی طرح مروی ہے۔

نبی کریم صلی اللہ علیہ وسلم کا ارشاد ہے قسم اٹھانا حانث ہونے یا نادم ہونے کا سبب ہے۔ ( ان دو میں سے ایک کام ضرور ہوگا) ۔

نبی کریم صلی اللہ علیہ وسلم نے ارشاد فرمایا : تین قسم کے لوگوں سے اللہ تعالیٰ قیامت کے دن کلام نہیں فرمائے گا، اور نہ ہی ان کو گناہوں سے پاک کرے گا اور ان کو دردناک عذاب دے گا، احسان جتلانے والا، شلوار ٹخنوں سے نیچے لٹکانے والا اور جھوٹی قسم اٹھا کر سامان فروخت کرنے والا۔

حضرت ابو ہریرۃ رضی اللہ عنہارشاد فرماتے ہیں : جھوٹ بیع کو خوشنما اور تیز کرتا ہے، سامان کو بکوا دیتا ہے لیکن کسب کو ختم کردیتا ہے۔