مصنف ابن ابي شيبه

حضرت جابر بن زید نے ریشم ادھار لیا۔ اس تاوان کے بدلہ میں جو ان کو پہنچا۔

ابراہیم فرماتے ہیں کہ ادھار بیع کرنے میں کوئی حرج نہیں ہے اگر صحت کی شرائط پوری ہوں۔

ابراہیم ، حضرت شعبی اور حضرت قاسم فرماتے ہیں کہ ادھار مہنگا بیچنے میں کوئی حرج نہیں ہے۔

حضرت ابن سیرین سے بیع عینہ کے متعلق دریافت کیا گیا ؟ فرمایا جب آدمی اپنا سامان بازار میں لے کرجاتا ہے ، تو وہ کچھ سامان نقد فروخت کرتا ہے اور کچھ سامان ادھار۔

حضرت ابن سیرین سے ریشم کی بیع ( ادھار) کے متعلق دریافت کیا گیا ؟ آپ نے فرمایا : جب آدمی سامان فروخت کرنے کا ارادہ کرتا ہے تو سامان رکھتا ہے پھر اگر اس کو نفع نقد مل رہا ہو تو بھی فروخت کردیتا ہے اور نفع ادھار میں مل رہا ہو پھر بھی فروخت کردیتا ہے۔

حضرت افلح فرماتے ہیں کہ میں نے حضرت قاسم سے دریافت کیا کہ : ایک شخص مجھ سے گندم اور زیتون طلب کرتا ہے اور میرے پاس یہ دونوں نہیں ہیں لیکن میں ان کا بھاؤ جانتا ہوں اور ان کے متعلق جانتا ہوں میں خرید لیتا ہوں پھر میں اسی کو ایک مدت کے بعد فروخت کرسکتا ہوں ؟ فرمایا ہاں۔