مصنف ابن ابي شيبه

حضرت زہری اور قتادہ رضی اللہ عنہ فرماتے ہیں کہ اگر اہل کتاب ، غلام اور بچہ گواہ ہوں پھر اہل کتاب مسلمان ہوجائے اور غلام آزاد ہوجائے اور بچہ بڑا ہوجائے تو ان کی گواہی دینا درست ہے، ہاں اگر ان کی پہلی والی حالت میں گواہی رد کردی گئی ہو تو پھر جائز نہیں۔

حضرت زہری رحمہ اللہ فرماتے ہیں کہ غلام اگر غلامی میں گواہی دے اور اس کی گواہی رد کردی جائے پھر وہ آزاد ہوجائے تو پھر اس کی گواہی ( اسی معاملہ میں جس میں پہلے رد کردی گئی تھی) درست نہیں ہے۔

حضرت حسن رضی اللہ عنہ فرماتے ہیں کہ غلام اور ذمی اگر گواہی دیں اور ان کی گواہی رد کردی جائے پھر غلام آزاد ہوجائے اور ذمی مسلمان ہوجائے تو ان کی گواہی درست ہے۔

ابراہیم رحمہ اللہ فرماتے ہیں کہ غلام گواہی دے اور اس کی گواہی رد کردی جائے، پھر وہ آزاد ہوجائے، تو پھر اس کی وہ گواہی معتبر نہیں، جبکہ حضرت حکم رحمہ اللہ فرماتے ہیں اس کی گواہی درست ہے۔

حضرت ابو سلمہ فرماتے ہیں کہ غلام اگر گواہی دے اور اس کی گواہی رد کردی جائے پھر آزاد ہوجائے تو اس کی گواہی معتبر نہیں ہے۔

حضرت شریح رحمہ اللہ فرماتے ہیں کہ اگر غلام گواہی دے اور اس کی گواہی رد کردی جائے پھر وہ آزاد ہوجائے تو اس کی گواہی معتبر نہیں۔

حضرت عمر رضی اللہ عنہ یہودی، نصرانی اور غلام کی گواہی کے متعلق فرماتے ہیں کہ جب انہوں نے کوئی گواہی دی جس کو وہ قائم نہ کرسکے (یعنی دو ہوگئی) یہاں تک کہ غلام آزاد ہوگیا اور یہودی اور نصرانی مسلمان ہوگئے تو ان کی گواہی جائز ہوگی تو ان کی گواہی درست ہے۔