مصنف ابن ابي شيبه

حضرت ابن عباس رضی اللہ عنہما دس کی بارہ کے ساتھ بیع کو ناپسند فرماتے تھے، اور فرماتے تھے کہ یہ عجمیوں کی بیع ہے۔

حضرت سعید بن جبیر رحمہ اللہ دس کی گیارہ کے ساتھ اور دس کی بارہ کے ساتھ بیع کرنے کو ناپسند کرتے تھے، راوی فرماتے ہیں کہ میں نے عرض کیا کہ پھر میں کس طرح کروں ؟ آپ رحمہ اللہ نے فرمایا کہ تو کہہ : میں اس کو اتنے میں لیتا ہوں ۔ اور اس کو اتنے اتنے میں فروخت کرتا ہوں۔

حضرت ابن عمر رضی اللہ عنہما ارشاد فرماتے ہیں کہ یہ سود ہے۔

حضرت سعید بن المسیب رحمہ اللہ سے بیع دہ دوازدہ ( دس کی بارہ کے بدلے میں ) کے متعلق سوال کیا گیا ؟ آپ رحمہ اللہ نے فرمایا اس میں کوئی حرج نہیں۔

ابراہیم رحمہ اللہ فرماتے ہیں کہ پہلے ہم اس کو ناپسند کرتے تھے پھر ہم اس میں کوئی حرج نہ سمجھتے تھے۔

ابراہیم اور حضرت ابن سیرین رحمہ اللہ فرماتے ہیں کہ بیع دہ ، دوازدہ میں کوئی حرج نہیں ہے۔

حضرت ابن عباس رضی اللہ عنہما فرماتے ہیں کہ یہ سود ہے۔

حضرت جعد بن ذکوان رحمہ اللہ فرماتے ہیں کہ میں قاضی شریح کی خدمت میں حاضر تھا آپ نے اس بیع کو جائز قرار دیا۔

حضرت مسروق اس بیع کو ناپسند کرتے تھے ، اور فرماتے کہ وہ یوں کہے : میں نے اتنے اتنے کا خریدا ہے اور اتنے کا فروخت کرتا ہوں۔

حسن رحمہ اللہ اس کو ناپسند سمجھتے تھے اور حضرت عکرمہ فرماتے ہیں یہ حرام ہے۔

حضرت ابن عباس رضی اللہ عنہما فرماتے ہیں کہ یہ سود ہے۔