مصنف ابن ابي شيبه

ابراہیم رحمہ اللہ سے دریافت کیا گیا کہ کوئی شخص حاملہ باندی کو فروخت کرے یا آزاد کر دے اور اس کے بطن میں جو بچہ ہے اس کو مستثنیٰ کر دے ، آپ رحمہ اللہ نے فرمایا اگر بچے کی خلقت ظاہر ہوگئی تو استثناء ٹھیک ہے ، اور اگر خلقت ظاہر نہ ہوئی تو استثناء ٹھیک نہیں۔

حضرت حسن رضی اللہ عنہ فرماتے ہیں کہ بیع میں اگر استثناء کرے تو نافذ ہوگا، لیکن آزادی میں استثناء نافذ نہ ہوگا۔

محمد رحمہ اللہ اس شخص کے متعلق فرماتے ہیں جو اپنی باندی کو آزاد کرے اور اس کے بطن کے بچے کا استثناء کر دے، آپ نے فرمایا اس کو استثناء کا حق ہے۔

حضرت زہری رحمہ اللہ فرماتے ہیں کہ باندی اور اس کا بچہ دونوں آزاد شمار ہوں گے۔

حضرت عطا ، حضرت شعبی رحمہ اللہ اور ابراہیم رحمہ اللہ فرماتے ہیں کہ اس کو استثناء کا حق ہے۔

حضرت شعبہ فرماتے ہیں کہ میں نے حضرت حکم اور حضرت حماد سے دریافت کیا کہ آدمی اگر باندی کو آزاد کرے اور اس کے بطن میں جو بچہ ہے اس کو مستثنیٰ کر دے ؟ آپ دونوں نے فرمایا اس کو ایسا کرنے کا حق ہے۔

حضرت ابن عمر رضی اللہ عنہما سے دریافت کیا گیا کہ آدمی اپنی باندی کو آزاد کرے اور اس کے بطن میں جو بچہ اس کو مستثنیٰ کر دے تو کیسا ہے ؟ آپ رضی اللہ عنہ نے فرمایا : اس کو استثناء کا حق ہے۔