مصنف ابن ابي شيبه

حضرت ابراہیم بن مہاجر رحمہ اللہ فرماتے ہیں کہ میں نے حضرت موسیٰ بن طلحۃ سے مزارعۃ کے متعلق دریافت کیا ؟ آپ نے مجھے بتایا کہ حضرت عثمان رضی اللہ عنہ نے حضرت خباب، حضرت عبد اللہ ، حضرت سعد اور حضرت صہیب رضی اللہ عنہ م کو اپنی زمین دی، اور میں نے دیکھا کہ آپ نے مزارعۃ بالثلث اور ربع کے تحت زمین دی۔

حضرت ابو جعفر رحمہ اللہ سے مروی ہے کہ نبی کریم صلی اللہ علیہ وسلم نے اپنی خیبر والی زمین مزارعۃ بالنصف کرتے ہوئے دی۔

حضرت سعد رضی اللہ عنہ اور حضرت ابن مسعود رضی اللہ عنہ مزارعۃ بالثلث، اور ربع فرمایا کرتے تھے۔

حضرت طاؤس فرماتے ہیں کہ حضرت معاذ رضی اللہ عنہ ہمارے پاس تشریف لائے، ہم لوگ اپنی زمینیں مزارعۃ بالثلث اور ربع کے تحت دیا کرتے تھے، آپ نے اس پر ہمیں ملامت نہ فرمائی۔

حضرت طاؤس سے اسی طرح مروی ہے۔

حضرت ابو جعفر رحمہ اللہ سے مروی ہے کہ نبی کریم صلی اللہ علیہ وسلم نے خیبر والوں کو اپنی زمین نصف مزارعۃ دی۔ پھر حضرت ابوبکر صدیق، حضرت عمر رضی اللہ عنہ ، حضرت عثمان رضی اللہ عنہ اور حضرت علی رضی اللہ عنہ پھر ان کے اہل و عیال نے آج تک مزارعۃ بالثلث اور ربع فرمائی۔

حضرت ابو جعفر رحمہ اللہ سے پوچھا گیا کہ زمین مزارعۃ بالثلث اور ربع کرتے ہوئے دینا کیسا ہے ؟ آپ نے فرمایا کہ اگر حضرت ابوبکر رضی اللہ عنہ ، حضرت عمر رضی اللہ عنہ اور حضرت علی رضی اللہ عنہ کے آل کو دیکھو گے تو آپ ان کو اس طرح کرتے ہوئے پاؤ گے۔

حضرت کلیب بن وائل فرماتے ہیں کہ میں نے حضرت ابن عمر رضی اللہ عنہما سے عرض کیا کہ ایک شخص کی اپنی زمین اور پانی ہے لیکن اس کے پاس دانہ اور بیل نہیں ہے، اس نے اپنی زمین مزارعۃ بالنصف کے طور پر مجھے دی میں نے اپنے بیج اور بیل کے ساتھ کھیتی باڑی کی ( اور جو کچھ نکلا) اس کو نصف تقسیم کرلیا، ( ایسا کرنا ٹھیک ہے) ؟ آپ نے فرمایا بہت اچھا ہے۔

حضرت علی رضی اللہ عنہ مزارعۃ بالنصف کرنے میں کوئی حرج نہ سمجھتے تھے۔

حضرت انس رضی اللہ عنہارشاد فرماتے ہیں کہ میری زمین اور میرا اونٹ برابر ہے۔

حضرت عمرو رحمہ اللہ فرماتے ہیں کہ میں نے حضرت سالم رحمہ اللہ کو فرماتے ہوئے سنا کہ : ابن خدیج رضی اللہ عنہاپنے نفس پر زیادتی چاہی، خدا کی قسم میں ضرور بضرور اس سے اونٹ کا کرایہ وصول کروں گا۔

حضرت طاؤس فرماتے ہیں کہ مزارعۃ بالنصف، ثلث اور ربع کرنے میں کوئی حرج نہیں ہے۔

حضرت ابن الاسود اپنے والد محترم کی زندگی میں دیہات والوں کے ساتھ مزارعۃ کرتے تھے۔

حضرت ابن الاسود رحمہ اللہ فرماتے ہیں کہ میں مزارعۃ بالثلث اور ربع کیا کرتا تھا، میں نے حضرت علقمہ اور حضرت الاسود رحمہ اللہ سے اس کے متعلق دریافت کیا۔ ( ان کو باخبر کیا اس بارے میں ) پس اگر وہ اس میں کچھ حرج سمجھتے تو مجھے اس سے ضرور منع کرتے۔

حضرت عمر بن عبد العزیز نے زمینوں کو مزارعۃ بالثلث اور ربع پر دینے کا حکم فرمایا تھا۔

حضرت عمر بن عبد العزیز رحمہ اللہ نے حضرت عدی رحمہ اللہ کو خط لکھا کہ مزارعۃ بالثلث اور ربع کرو۔

حضرت قاسم اور حضرت ابن سیرین اس میں کوئی حرج نہ سمجھتے تھے کہ کوئی شخص دوسرے کو اپنی زمین مزارعۃ بالثلث، ربع اور عشر پر دے، اور اس پر نفقہ میں کوئی چیز لازم نہیں ہے۔

حضرت ہشام رحمہ اللہ فرماتے ہیں کہ میرے والد زمین کرایہ ( مزارعت) پر دینے میں کوئی حرج نہیں سمجھتے تھے۔

حضرت سعید فرماتے ہیں کہ میں نے حضرت سالم رحمہ اللہ سے دریافت کیا ؟ آپ نے فرمایا اس میں کوئی حرج نہیں۔

حضرت زید بن ثابت رضی اللہ عنہ فرماتے ہیں کہ اللہ تعالیٰ حضرت رافع بن خدیج رضی اللہ عنہ کی مغفرت فرمائے، خدا کی قسم میں ان سے زیادہ اس حدیث کو جانتا ہوں، آنحضرت صلی اللہ علیہ وآلہ وسلم کی خدمت میں دو شخص جھگڑتے ہوئے آئے، آپ صلی اللہ علیہ وسلم نے ارشاد فرمایا : اگر تمہاری یہی حالت ہے تو تم لوگ زمین کرایہ ( مزارعۃ) پر نہ دیا کرو، حضرت رافع رضی اللہ عنہ نے صرف آپ صلی اللہ علیہ وسلم کا آخری قول ” زمین مزارعۃ پر مت دیا کرو “ سنا۔

حضرت ابو جعفر رحمہ اللہ فرماتے ہیں کہ مدینہ منورہ میں مہاجرین کا کوئی بھی گھر ایسا نہ تھا جو اپنی زمینیں مزارعۃ بالثلث اور ربع پر نہ دیتے ہوں۔

حضرت ابن عمر رضی اللہ عنہما اپنی زمین مزارعۃ بالثلث پر دیا کرتے تھے۔

حضرت ابن عمر رضی اللہ عنہما ارشاد فرماتے ہیں کہ میری زمین اور میرا اونٹ ( کرایہ پر دینے کے اعتبار سے ) برابر ہیں۔

حضرت ابن عمر رضی اللہ عنہما سے مروی ہے کہ نبی کریم صلی اللہ علیہ وسلم نے خیبر والوں کو زمین مزارعۃ بالنصف پر عطاء فرمائیں۔

حضرت عبد اللہ بن عیسیٰ فرماتے ہیں کہ حضرت عبد الرحمن بن ابی لیلیٰ کی مقام فوارہّ میں زمین تھی جو آپ نے مزارعۃ بالثلث اور ربع پر دی ہوئی تھی، آپ نے مجھے ان لوگوں کے درمیان تقسیم کرنے کے لئے بھیجا تھا۔