مصنف ابن ابي شيبه

حضرت حصین رحمہ اللہ فرماتے ہیں کہ میں عباس بن تمام کی شادی میں شریک تھا۔ ہمارے ساتھ حضرت عکرمہ بھی تھے۔ کچھ لوگ بادام اور شیرینی وغیرہ لائے تاکہ اسے بکھیریں اور لوگوں کی طرف اچھالیں۔ حضرت عکرمہ نے فرمایا کہ یہ چیزیں پلیٹوں میں لاؤ تاکہ ہم اپنی ضرورت کے مطابق لے لیں۔

حسن رحمہ اللہ فرماتے ہیں کہ شادیوں اور ولیموں وغیرہ میں شیرینی وغیرہ بکھیرنے اور ایک دوسرے سے چھین کر کھانے میں کوئی حرج نہیں۔

حضرت ابن سیرین رحمہ اللہ پسند فرماتے تھے کہ شرینی وغیرہ کو پلیٹوں میں لایا جائے تاکہ اس میں سے لوگ بقدر حاجت لے لیں۔

حضرت شعبی رحمہ اللہ بھی اس میں کوئی حرج نہیں سمجھتے۔

ابراہیم رحمہ اللہ فرماتے ہیں کہ اس میں سے بچے اٹھا لیتے ہیں۔

حضرت عبد الرحمن بن ابی لیلی رحمہ اللہ کو ایک شادی میں بلایا گیا، اس شادی میں لوگ لٹانے کے لئے شیرینی لے کر آئے، آپ رحمہ اللہ نے فرمایا کہ یہ شیرینی ان کے درمیان تقسیم کردو۔

حضرت موسیٰ بن عبد اللہ ابن یزید انصاری رحمہ اللہ فرماتے ہیں کہ میں ایک شادی میں تھا، لوگ شیرینی بکھیرنے لگے تو حضرت عبد الرحمن بن ابی لیلی رحمہ اللہ نے فرمایا ( لٹاؤ مت) اس کو رکھ دو اور تقسیم کردو۔

حضرت عبد اللہ بن یزید الخطمی رحمہ اللہ بادام وغیرہ لٹانے کے متعلق ارشاد فرماتے ہیں کہ اگر آپ لوگ وہ رکھ دو گے تو ہم ان تک پہنچ جائیں گے اور اگر آپ لوگ لٹاؤ گے تو ہم اس تک نہ پہنچ پائیں گے۔

حضرت ابو جعفر رحمہ اللہ فرماتے ہیں کہ میں نے کئی صالح لوگوں کو پایا جو لوٹی ہوئی چیز کھانے کو ناپسند کرتے تھے۔

ابراہیم بادام اور شیرینی لٹانے کو ناپسند کرتے تھے، حضرت عامر رحمہ اللہ فرماتے ہیں کہ کوئی حرج نہیں ہے، بیشک اس کو ناپسند اس لئے کیا گیا ہے کہ شریف آدمی کا نفس اس کو پسند نہیں کرتا۔

حضرت ابو مسعود انصاری رضی اللہ عنہ کا معمول تھا کہ جب بچوں پر چیزیں لٹائی جا رہی ہوتیں تو یہ بچوں کو ان کے لینے سے منع فرماتے اور ان کو خرید کردیتے۔

حضرت خالد بن سعد بچوں پر شیرینی وغیر لٹانے کو ناپسند سمجھتے تھے۔

حضرت حکم رحمہ اللہ فرماتے ہیں کہ میں ابراہیم رحمہ اللہ اور حضرت شعبی رحمہ اللہ کے ساتھ تھا، اُن دونوں حضرات سے شادی میں شیرینی وغیرہ لٹانے کے متعلق دریافت کیا گیا، ابراہیم رحمہ اللہ نے اس کو ناپسند فرمایا، جبکہ حضرت شعبی رحمہ اللہ نے اس میں کوئی حرج نہ سمجھا۔

حضرت شعبی رحمہ اللہ اس میں کوئی حرج نہ سمجھتے، اور ابراہیم رحمہ اللہ اس کو ناپسند کرتے۔

حضرت عکرمہ رحمہ اللہ شیرینی وغیرہ لٹانے کو ناپسند کرتے تھے۔

حضرت عطاء رضی اللہ عنہ بھی اس کو ناپسند کرتے تھے۔