مصنف ابن ابي شيبه

حضرت شریح رحمہ اللہ فرماتے ہیں کہ حماقت کی وجہ سے ( باندی یا غلام کو ) واپس کردیا جائے گا۔

حضرت زید ابو المعلّی رحمہ اللہ فرماتے ہیں کہ میں حضرت ایاس بن معاویہ رحمہ اللہ کے پاس حاضر تھا، اس کے پاس ایک باندی کا جھگڑا لایا گیا، ایک شخص نے کہا کہ میں نے اِ س سے باندی خریدی تھی یہ تو احمق ہے، دوسرے نے کہا کہ مجھے تو نہیں معلوم کہ حماقت کی وجہ سے واپس لوٹایا جائے گا، اس شخص نے عرض کیا کہ حماقت بھی تو جنون کی طرح ہے، آپ رحمہ اللہ نے اس خاتون (باندی) سے فارسی میں دریافت کیا کہ تجھے وہ رات یاد ہے جس میں تو پیدا ہوئی تھی ؟ اس نے کہا کہ ہاں، آپ رحمہ اللہ نے اس سے پوچھا کہ تیری کون سی ٹانگ لمبی ہے ؟ اس نے ایک ٹانگ کی طرف اشارہ کرتے ہوئے کہا کہ یہ، پس اس کو واپس پہلے مالک کی طرف لوٹا دیا گیا۔

حضرت عامر رحمہ اللہ فرماتے ہیں کہ معمولی حماقت ونادانی کی وجہ سے واپس نہیں کیا جائے گا، ہاں البتہ اگر حماقت پاگل پن جیسی ہو تو اسے واپس کردیا جائے گا۔