مصنف ابن ابي شيبه

حضرت شعبی رحمہ اللہ فرماتے ہیں کہ آدمی کا اپنی بہن یابیٹی کے بالوں کو مستقل طور پر دیکھنا مکروہ ہے۔

حضرت طاؤس رحمہ اللہ کے نزدیک آدمی کا اپنی بیٹی یا بہن کے بالوں کودیکھنامکروہ ہے۔

حضرت عطاء رحمہ اللہ فرماتے ہیں کہ جن عورتوں سے آدمی کا نکاح حرام ہے ان کے سروں کا پردہ کرنا میرے نزدیک اچھا ہے۔ البتہ آدمی کی نگاہ اگر پڑجائے تو کوئی حرج نہیں۔

حضرت ابو صالح رحمہ اللہ فرماتے ہیں کہ حضرت حسن اور حضرت حسین رضی اللہ عنہ ما اپنی بہن حضرت ام کلثوم رضی اللہ عنہا کے پاس اس وقت چلے جایا کرتے تھے جب وہ کنگھی کررہی ہوتی تھیں۔

حسن رحمہ اللہ سے سوال کیا گیا کہ کیا عورت اپنے بھائی کے سامنے اپنا دوپٹہ اتار سکتی ہے ؟ انہوں نے فرمایا کہ خدا کی قسم ! وہ ایسا نہیں کرسکتی۔

حضرت عامر رحمہ اللہ فرماتے ہیں کہ ہر ذی محرم عورت کے بال دیکھنا بھی مکروہ ہے۔