مصنف ابن ابي شيبه

حضرت مسعود بن حکم کی والدہ فرماتی ہیں کہ گویا کہ وہ منظر آج بھی میری آنکھوں کے سامنے ہے کہ ایام تشریق میں حضرت علی رضی اللہ عنہ نبی کریم صلی اللہ علیہ وآلہ وسلم کے خچر پر سوار یہ ندا دے رہے تھے کہ : آگاہ ہو جاؤ نبی کریم صلی اللہ علیہ وآلہ وسلم ارشاد فرماتے ہیں کہ : یہ روزے رکھنے کے دن نہیں ہیں یہ کھانے پینے کے دن ہیں۔

حضرت ابو الشعثائ سے مروی ہے کہ ہم لوگ منیٰ میں حضرت عبد اللہ بن عمر رضی اللہ عنہما کے ساتھ بیٹھے ہوئے تھے، کھانا لایا گیا تو حضرت ابن عمر رضی اللہ عنہما پیچھے ہٹ گئے اور فرمایا کہ میرا روزہ ہے، ان کو فرمایا کھائیے یہ کھانے، پینے کے دن ہیں، تو انھوں نے روزہ افطار کرلیا۔

حسن فرماتے ہیں کہ ایام تشریق کھانے اور ذکر کے دن ہیں۔

حضرت حسن بن عبید اللہ فرماتے ہیں کہ میں نے ابراہیم سے ایام تشریق میں روزہ رکھنے کے متعلق دریافت کیا ؟ آپ نے فرمایا کہ حضرت مسر وق فرماتے ہیں کہ یہ کھانے پینے کے دن ہیں۔

حضرت جعفر کے والد سے مروی ہے کہ نبی کریم صلی اللہ علیہ وآلہ وسلم نے حضرت بدیل بن ورقاء الخزاعی کو ایام منیٰ میں بھیجا کہ منادی کردو کہ یہ کھانے، پینے کے دن ہیں۔

انصار کے ایک شخص سے مروی ہے کہ نبی کریم صلی اللہ علیہ وآلہ وسلم نے ایام تشریق میں مجھے بھیجا اور حکم دیا کہ میں لوگوں میں منادی کروا دوں کہ یہ کھانے پینے کے دن ہیں۔

حضرت بشر بن سحیم سے مروی ہے کہ نبی کریم صلی اللہ علیہ وآلہ وسلم نے ایام تشریق میں خطبہ دیا اور فرمایا : جنت میں صرف مؤمن شخص داخل ہوگا، اور ایام تشریق کھانے پینے کے دن ہیں۔

حضرت عمر بن خلدہ انصاری کی والدہ سے مروی ہے کہ نبی کریم صلی اللہ علیہ وآلہ وسلم نے حضرت علی رضی اللہ عنہ کو بھیجا کہ وہ منادی کردیں کہ : ایام تشریق کھانے، پینے اور بیوی سے صحبت کرنے کے دن ہیں۔

حضرت عطاء فرماتے ہیں کہ ہم لوگ منیٰ میں ایام تشریق کے روزے رکھا کرتے تھے پھر ہمیں اس سے منع کردیا گیا۔

حضرت عبد اللہ بن حذافہ فرماتے ہیں کہ نبی کریم صلی اللہ علیہ وآلہ وسلم نے ایام تشریق میں مجھے حکم فرمایا کہ میں منادی کروا دوں کہ : یہ کھانے، پینے کے دن ہیں۔

حضرت ابو ہریرہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : ایام تشریق کھانے، پینے کے دن ہیں۔

حضرت محمد بن ابو الملیح فرماتے ہیں کہ ایام تشریق کھانے، پینے کے دن ہیں۔

حضرت عقبہ بن عامر سے مروی ہے کہ نبی کریم صلی اللہ علیہ وآلہ وسلم نے فرمایا : عرفہ، قربانی کا دن اور ایام تشریق مسلمانوں کی عید کے دن ہیں، یہ کھانے پینے کے دن ہیں۔