مصنف ابن ابي شيبه

حضرت ابن عمر رضی اللہ عنہما نے حضرت ابن زبیر کو سورج غروب ہونے کے بعد فرمایا : اب عرفہ سے نکلو۔

حضرت عبد اللہ بن عمرو رضی اللہ عنہ سے مروی ہے کہ حضرت جبرئیل ابراہیم کے پاس تشریف لائے اور ان کے ساتھ عرفات میں رہے، یہاں تک کہ جب اتنا وقت ہوگیا کہ ایک آدمی جلدی سے نماز مغرب پڑھ سکتا ہو تو ان کو لے کر نکلے۔

حضرت عبد اللہ بن عمرو رضی اللہ عنہ سے اسی طرح مروی ہے۔

حضرت محمد بن قیس بن مخرمہ بن المطلب سے مروی ہے کہ نبی کریم صلی اللہ علیہ وآلہ وسلم نے عرفات میں خطبہ دیا اور فرمایا : أما بعد ! آج حج اکبر کا دن ہے، جاہلیت اور بت پرست لوگ اس دن غروب شمس سے پہلے ہی نکل جاتے تھے، جس وقت سورج پہاڑوں کے پیچھے ہوتا تھا گویا کہ لوگوں کے عمامے ان کے چہروں پر ہیں، ہم لوگ سورج غروب ہونے کے بعد جائیں گے پس کوئی شخص جلدی نہ کرے، ہمارا طریقہ مشرکوں اور بت پرستوں کے مخالف ہے۔

حضرت ابن زبیر ارشاد فرماتے ہیں کہ امام سورج غروب ہونے کے بعد عرفات سے نکلے۔

حضرت ابن عمر رضی اللہ عنہما عرفات سے اس وقت نکلنا بہتر سمجھتے تھے جب رات ظاہر ہوجائے اور روزہ دار روزہ افطار کرلے۔

حضرت عبد الرحمن بن یزید فرماتے ہیں کہ میں حضرت عبد اللہ کے ساتھ عرفات میں تھا اور لوگوں پر حضرت عثمان امیر تھے، جب سورج غروب ہوا تو حضرت عبد اللہ نے فرمایا اگر امیر المؤمنین اس وقت عرفات سے نکل پڑیں تو وہ سنت کو پالیں گے، پس آپ فوراً چل پڑے۔