مصنف ابن ابي شيبه

حضرت ابن عمر رضی اللہ عنہما سے مروی ہے کہ نبی کریم صلی اللہ علیہ وآلہ وسلم جب مکہ مکرمہ تشریف لائے تو آپ صلی اللہ علیہ وآلہ وسلم نے حجر اسود اور رکن یمانی کا استلام فرمایا اور اس کے علاوہ کسی رکن کا استلام نہ فرمایا۔

حضرت عطاء فرماتے ہیں کہ میں نے اپنے مشائخ میں سے حضرت ابن عباس رضی اللہ عنہما ، حضرت جابر، حضرت ابو ہریرہ رضی اللہ عنہ ، حضرت عبید بن عمیر کو پایا کہ وہ حجر اسود اور رکن (یمانی) کا استلام فرماتے اس کے علاوہ کسی رکن کا استلام نہ کرے۔

حضرت ابراہیم بن عبد الاعلیٰ فرماتے ہیں کہ میں نے حضرت سوید بن غفلہ کو دیکھا آپ نے بیت اللہ کے تمام ارکان کا استلام کیا۔

حضرت عطاء سے مروی ہے کہ جب حضرت عمر نے حج کیا تو حجر اسود کا استلام کیا، اور حضرت یعلی رضی اللہ عنہ بن امیہ نے تمام ارکان کا استلام کیا، حضرت عمر نے ان سے فرمایا : اے یعلی رضی اللہ عنہ ! یہ آپ نے کیا کیا ؟ حضرت یعلی رضی اللہ عنہ نے فرمایا کہ میں نے تمام ارکان کا استلام کیا ہے کیونکہ خانہ کعبہ کی کوئی چیز ایسی نہیں ہے جس کو (بغیر استلام کے) چھوڑا جائے، حضرت عمر نے فرمایا کہ کیا آپ نے نہیں دیکھا کہ نبی کریم صلی اللہ علیہ وآلہ وسلم نے صرف حجر اسود کا استلام کیا تھا ؟ حضرت یعلی رضی اللہ عنہ نے فرمایا کیوں نہیں، حضرت عمر نے فرمایا کہ تو کیا آپ کے لیے اس میں نمونہ نہیں ہے ؟ حضرت یعلی رضی اللہ عنہ نے فرمایا کیوں نہیں۔

حضرت مجاہد طواف کے طاق چکروں میں بہت کم ہی ایسا ہوتا کہ حجر اسود اور رکن یمانی کے استلام کو چھوڑتے۔

حضرت مجاہد فرماتے ہیں حجر اسود کے ساتھ جو دو رکن ہیں ان کا استلام نہیں کیا جائے گا۔

حضرت عبد اللہ نے حضرت معاویہ کو دیکھا کہ آپ نے بیت اللہ کا طواف کیا اور تمام ارکان کا استلام فرمایا اور فرمایا کہ اس میں کوئی بھی چیز ایسی نہیں ہے جس کو چھوڑا جائے۔

حضرت عباد نے حضرت ابن زبیر کو ایسے کرتے ہوئے دیکھا اور انہوں نے فرمایا کہ اس میں کوئی بھی چیز چھوڑنے والی نہیں ہے۔

حضرت جابر بن زید فرماتے ہیں کہ بیت اللہ کی کوئی بھی چیز بغیر استلام کے نہیں چھوڑی جائے گی۔

حضرت عروہ تمام ارکان کا استلام کرتے تھے اور اسی پر طواف کو مکمل کرتے، اور اپنے پیٹ اور پیٹھ کو اور اپنے پہلوؤں کو خانہ کعبہ کے ساتھ چمٹاتے اور لگاتے۔