مصنف ابن ابي شيبه

حضرت جمیل بن زید فرماتے ہیں کہ میں نے حضرت ابن عمر رضی اللہ عنہما کو دیکھا کہ آپ نے طواف کے تین چکر لگائے پھر آرام کے لیے بیٹھ گئے، آپ کا غلام ہمیں پنکھے سے ہوا دے رہا تھا، پھر آپ کھڑے ہوئے اور اپنے طواف کے چکر مکمل کیے۔

حضرت ابن جریج فرماتے ہیں کہ میں نے حضرت عطاء سے دریافت کیا کہ کیا طواف میں آرام کے لیے بیٹھ سکتا ہوں ؟ آپ نے فرمایا کہ ہاں۔

حضرت عطاء اس میں کوئی حرج نہیں سمجھتے کہ اگر کوئی شخص سارے چکر اکٹھے لگانے سے عاجز آجائے تو وہ صفا ومروہ کی سعی کے دوران آرام کرسکتا ہے۔

حضرت عطاء فرماتے ہیں اس میں کوئی حرج نہیں کہ صفا ومروہ کی سعی میں آرام کیا جائے۔

حضرت ابو العالیہ الواسطی فرماتے ہیں کہ میں نے حسن کو صفا ومروہ کی سعی کے دوران آرام کرتے ہوئے دیکھا، پھر میں نے حضرت مجاہد سے اس کا ذکر کیا تو آپ نے اس کو ناپسند فرمایا۔