مصنف ابن ابي شيبه

حضرت ابن عباس رضی اللہ عنہما نے حالت احرام میں اس شعر کی مثال پیش کی :” وہ اونٹ کی چال چل کے ہمارے پاس سے گزرتی ہیں، اگر پرندہ سچ بولے تو ہم کسی مانوس کو محسوس کرتے ہیں۔ “ آپ سے کہا گیا کہ آپ حالت احرام میں فحش کلام کر رہے ہیں، آپ نے فرمایا فحش کلام تو وہ ہوتا ہے جس سے حالت احرام میں عورتوں کو خطاب کیا جاتا تھا۔

حضرت طاؤس محرم کے لیے فحش کلام کرنے کو ناپسند کرتے تھے، راوی کہتے ہیں کہ میں نے عرض کیا فحش کلام کیا ہے ؟ آپ نے فرمایا کہ یوں کہنا : اگر میں احرام میں نہ ہوتا تو تجھے پا لیتا (ہمبستری کرتا) ۔

حضرت عطاء محرم کے لیے فحش گفتگو کو ناپسند کرتے تھے۔

حضرت عبد اللہ بن عبید اللہ بن عمیر سے بھی یہی مروی ہے۔

حضرت طاؤس فرماتے ہیں کہ حضرت عبد اللہ بن زبیر نے ارشاد فرمایا : خبردار عورتوں سے (حالت احرام میں) بچو، بیشک فحش کلام بھی گندگی (گناہ) میں سے ہے، حضرت طاؤس فرماتے ہیں کہ میں نے حضرت ابن عباس رضی اللہ عنہما سے اس کا ذکر فرمایا : آپ نے فرمایا حضرت ابن زبیر نے سچ کہا۔