مصنف ابن ابي شيبه

حضرت سالم فرماتے ہیں کہ فرض نماز طواف کی دو رکعت کے لیے بھی کافی ہوجائے گی۔

حضرت طاؤس سے بھی یہی مروی ہے۔

ابراہیم سے بھی یہی مروی ہے۔

حضرت عبد الملک فرماتے ہیں کہ میں نے طواف مکمل کیا اور فرض نماز میں شریک ہوگیا، پھر نماز کے بعد میں نے طواف کی دو رکعتیں ادا کرنے کا ارادہ کیا تو وہاں کچھ لوگ بیٹھے ہوئے تھے میں ان کے پاس آیا اور ان سے سوال کیا ؟ ایک شیخ نے مجھ سے کہا : کیا تو حضرت ابن عمر رضی اللہ عنہما کے فعل سے راضی نہیں ہے ؟ میں نے ان کو دیکھا تھا انہوں نے اس طرح کیا تھا۔

حضرت وبرہ، حضرت سفیان اور حضرت سعید بن جبیر فرماتے ہیں کہ فرض نماز طواف کی دو رکعات کے لیے بھی کافی ہوجائے گی۔

حسن فرماتے ہیں کہ سنت گزر چکی ہے کہ سات چکر طواف مکمل کرلینے کے بعد دو رکعتیں ہیں۔ کوئی فرض ونفل ان کے لیے کافی نہ ہوں گے۔

حضرت عطاء ، حضرت طاؤس اور حضرت مجاہد فرماتے ہیں کہ فرض نماز طواف کی دو رکعات کے لیے بھی کافی ہوجائے گی۔