مصنف ابن ابي شيبه

حضرت ابن عباس رضی اللہ عنہما ارشاد فرماتے ہیں کہ جب تم نے رمی کرلی تو اب تمہارے لیے عورتوں کے سوا سب چیزیں حلال ہوگئیں اور فرماتے ہیں کہ بیشک میں نے رسول اکرم (صلی اللہ علیہ وآلہ وسلم) کو دیکھا آپ کے سر پر مشک ملی ہوئی تھی، کیا اس میں خوشبو تھی یا نہ تھی (یعنی ظاہری بات ہے کہ اس میں خوشبو تھی لہٰذا عورتوں کے علاوہ اب سب حلال ہوچکا ہے) ۔

حضرت عطاء سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : جب تم رمی کرلو، اپنا حلق کروا لو اور قربانی کو ذبح کرلو تو عورتوں کے سوا سب چیزیں تم پر حلال ہیں۔

حضرت عائشہ رضی اللہ عنہا سے بھی اسی طرح مروی ہے۔

حضرت ابن زبیر ارشاد فرماتے ہیں کہ جب تم نے یوم النحر میں رمی کرلی تو اب عورتوں کے سوا سب چیزیں تم پر حلال ہیں، (وہ سب اشیاء جو احرام کی وجہ سے ممنوع تھیں) ۔

حضرت عائشہ رضی اللہ عنہا ارشاد فرماتی ہیں کہ جب رمی کرلی تو عورتوں کے سوا سب ممنوعہ چیزیں محرم کے لیے حلال ہیں۔

ابراہیم فرماتے ہیں کہ جب رمی کرلی تو عورتوں کے سوا سب چیزیں اس کے لیے حلال ہوگئیں، اور جب وہ طواف بھی کرلے تو اس پر عورت بھی حلال ہوگئی۔

حضرت علقمہ فرماتے ہیں کہ جب رمی کرلی تو عورتوں کے سوا باقی ممنوعہ چیزیں حلال ہوگئیں۔

حضرت ابن عمر رضی اللہ عنہما اور حضرت عمر ارشاد فرماتے ہیں کہ جب قربانی کرلی اور حلق کروا لیا تو عورتوں اور خوشبو کے علاوہ باقی سب چیزیں حلال ہوگئیں۔

حضرت عطاء فرماتے ہیں کہ جب رمی کرلی تو عورتوں کے سوا باقی تمام چیزیں حلال ہیں۔

حسن ارشاد فرماتے ہیں کہ جب رمی کرلی تو اب محرم کے لیے عورتوں، خوشبو اور شکار کے علاوہ باقی چیزیں حلال ہیں۔

حضرت عطاء فرماتے ہیں کہ جب تم نے مناسک حج پورے کرلیے تو اب عورت اور شکار کے علاوہ باقی سب چیزیں تم پر حلال ہیں۔

سلیمان فرماتے ہیں کہ میں نے رمی کرنے کے بعد اپنی بیوی کا بوسہ لے لیا پھر میں نے اس کے متعلق حضرت عطاء سے دریافت کیا ؟ آپ نے مجھے بکری ذبح کرنے کا حکم فرمایا۔

حضرت ابن زبیر ارشاد فرماتے ہیں کہ جب رمی کرلی تو عورت کے علاوہ باقی سب چیزیں حلال ہیں۔