مصنف ابن ابي شيبه

حضرت ابوبکر بن عبد الرحمن بن حارث فرماتے ہیں کہ حضرت ابو معقل نبی کریم صلی اللہ علیہ وآلہ وسلم کی خدمت اقدس میں حاضر ہوئے اور عرض کیا : اے اللہ کے رسول (صلی اللہ علیہ وآلہ وسلم) ! حضرت ام معقل نے حج کرنے کی نذر مانی تھی لیکن اس کے اسباب اس کے لیے میسر نہیں ہیں، آپ صلی اللہ علیہ وآلہ وسلم نے فرمایا : وہ رمضان میں عمرہ کرلے (اس کا ثواب حج کے برابر ہے) ۔

حضرت ام معقل سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : رمضان کے مبارک مہینے میں عمرہ کرو، بیشک یہ (ثواب میں) حج کے برابر ہے۔

انصار کے ایک شخص کہتے ہیں کہ نبی کریم صلی اللہ علیہ وآلہ وسلم نے مجھے اور میری اہلیہ کو فرمایا : تم دونوں رمضان کے مہینے میں عمرہ کرو کہ رمضان کا عمرہ حج کرنے کے برابر ہے۔

حضرت وھب بن خنش سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : رمضان کے مہینے میں عمرہ کرنا حج کے برابر ہے۔

حضرت ابن عباس رضی اللہ عنہما سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : رمضان میں عمرہ کرنا حج کے برابر ہے۔

حضرت شعبی سے دریافت کیا گیا کہ یہ حج اکبر ہے، پھر حج اصغر کیا ہے ؟ آپ نے فرمایا : رمضان کے مہینے میں عمرہ کرنا۔

حضرت سعید بن جبیر اور حضرت مجاہد رمضان کے مہینے میں جعرانہ سے عمرہ کرتے تھے۔

حضرت عبد الملک بن سلیمان فرماتے ہیں کہ میں اور حضرت عطاء رمضان میں عمرہ کرنے کے لیے نکلے اور ہم نے مقام جعرانہ سے احرام باندھا۔

حضرت ابوبکر بن عبد الرحمن رمضان کے علاوہ عمرہ نہ کرتے تھے۔