مصنف ابن ابي شيبه

حضرت ابو ہریرہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم کے پاس ایک انصاری شخص کا جنازہ لایا گیا، آپ صلی اللہ علیہ وآلہ وسلم نے اس کی نماز جنازہ ادا فرمائی پھر دریافت فرمایا : اس نے کیا چھوڑا ہے ؟ صحابہ کرام نے عرض کیا : دو یا تین دینار چھوڑے ہیں، آپ صلی اللہ علیہ وآلہ وسلم نے فرمایا دو یا تین داغ چھوڑے ہیں۔

حضرت عبد الرحمن بن العدائ فرماتے ہیں کہ میں نے حضرت ابو امامہ سے سنا وہ رسول اکرم (صلی اللہ علیہ وآلہ وسلم) کی حدیث بیان کرتے ہیں کہ ایک شخص کا انتقال ہوا اس نے ایک یا دو دینار چھوڑے، نبی کریم صلی اللہ علیہ وآلہ وسلم نے ارشاد فرمایا : ایک داغ یا دو داغ چھوڑے ہیں۔

حضرت عبد اللہ فرماتے ہیں کہ نبی کریم صلی اللہ علیہ وآلہ وسلم سے ایک سیاہ فام غلام ملا پھر اس کا انتقال ہوگیا، نبی کریم صلی اللہ علیہ وآلہ وسلم کو اس کے بارے میں آگاہ کیا گیا، آپ صلی اللہ علیہ وآلہ وسلم نے فرمایا : دیکھو اس نے کچھ چھوڑا ہے ؟ صحابہ کرام نے عرض کیا دو دینار چھوڑے ہیں۔ نبی کریم صلی اللہ علیہ وآلہ وسلم نے فرمایا یہ دو داغ ہیں۔

حضرت برید بن اصرم فرماتے ہیں کہ میں نے حضرت علی رضی اللہ عنہ کرم اللہ وجہہ سے سنا وہ فرماتے ہیں کہ اصحاب صفہ میں سے ایک شخص کا انتقال ہوا، صحابہ کرام نے عرض کیا اے اللہ کے رسول (صلی اللہ علیہ وآلہ وسلم) ! اس نے ایک دینار اور ایک درھم چھوڑا ہے۔ آپ صلی اللہ علیہ وآلہ وسلم نے فرمایا : دو داغ ہیں، تم اپنے ساتھی کی نماز جنازہ اد کرلو۔