مصنف ابن ابي شيبه

حضرت ابو میسرہ سے مروی ہے کہ جب نبی کریم صلی اللہ علیہ وآلہ وسلم کو حضرت زید، حضرت جعفر اور حضرت عبد اللہ بن رواحہ کی شھادت کی اطلاع ملی تو آپ صلی اللہ علیہ وآلہ وسلم نے ان کے کام (معاملہ) کو ذکر فرمایا اور پھر فرمایا : اے اللہ ! تو زید کی مغفرت فرما اے اللہ ! تو زید کی مغفرت فرما، اے اللہ ! تو زید کی مغفرت فرما، اے اللہ ! تو جعفر اور عبد اللہ بن رواحہ کی مغفرت فرما۔

حضرت حریث بن ظھیر فرماتے ہیں کہ جب حضرت عبد اللہ کو حضرت ابو الدرداء کی وفات کی اطلاع ملی تو فرمایا : ان کے بعد ان کی طرح کا قائم مقام نہ ہوگا۔

حضرت عاصم فرماتے ہیں کہ جب میں نے حسن کو حضرت شعبی کی وفات کی اطلاع دی تو آپ نے فرمایا : اللہ تعالیٰ ان پر رحم فرمائے، خدا کی قسم ! اسلام میں ان کا عظیم مقام تھا۔

حضرت ابن ابجر فرماتے ہیں کہ میں نے حضرت شعبی کو ابراہیم کی وفات کی اطلاع دی تو آپ نے فرمایا : اللہ تعالیٰ ان پر رحم فرمائے بہر حال ان کے بعد ان کی طرح ان کا قائم مقام نہ ہوگا، بہر حال مرنے کے بعد بھی زندوں سے زیادہ فقیہ ہیں۔

حضرت یزید بن ابی زیاد فرماتے ہیں کہ حضرت ابو عبد الرحمن کا جنازہ لے کر لوگ حضرت ابو جحیفہ کے پاس سے گزرے تو آپ نے فرمایا : آرام و سکون پایا اور ان سے آرام و راحت لوگوں نے پایا۔

حضرت ابو عثمان فرماتے ہیں کہ میں حضرت نعمان بن مقرن کی وفات کی خبر لے کر حضرت عمر کے پاس آیا تو آپ نے اپنا ہاتھ سر پر رکھ کر رونا شروع کردیا۔

حضرت نافع فرماتے ہیں کہ حضرت عبد اللہ بن عمر رضی اللہ عنہما بازار میں تھے آپ کو وائل بن حجر کی وفات کی اطلاع دی گئی تو آپ کھڑے ہوگئے اور آپ پر رونے کا غلبہ ہوگیا۔

حضرت ابو کلثوم فرماتے ہیں کہ میں نے حضرت ابن الحنفیہ سے سنا وہ حضرت عبد اللہ بن عباس رضی اللہ عنہما کے جنازے میں فرما رہے تھے : آج علوم کا ماہر اور علوم میں کامل وفات پا گیا۔

حضرت عمار فرماتے ہیں کہ ہم حضرت زید بن ثابت کے جنازے میں حضرت ابن عباس رضی اللہ عنہما کے ساتھ محل کے سایہ میں بیٹھے ہوئے تھے، آپ نے فرمایا : آج بہت زیادہ علم دفن کردیا گیا۔